بنەماڵەی خالیدی خولەسوور روونكردنەوە دەدەن

15207 جار خوێندراوەتەوە کات12:55 بەروار13-03-2019
بنەماڵەی خالیدی خولەسوور روونكردنەوە دەدەن

راچڵەكین-
كوڕێكی خالیدی خولەسوور كە هاوكات سەرۆكی عەشیرەتی غەوارەشە رەتیدەكاتەوە كە "گوایە كوڕانی ئەوان هەستابن بە دزینی پارەی مووچەی كارمەندانی نەخۆشخانەی شار". ‎


شاهۆ خالید خولەسوور ‎سەرۆكی عەشیرەتی غەوارە لە روونكردنەوەیەكدا كە وێنەیەكی دەست راچلەكین كەوتووە ئاماژە بەوە دەكات كە، وەك پیشەی هەمیشەی ناحەزانمان و چاوهەڵنەهاتنی دووژمنانمان بە بوون و وجوودی بنەماڵەكەمان جارێكی دیکە لەلایەن پەیج و ئەكاونتی تۆڕە كۆمەڵایەتییەكان كەوتینە بەر شاڵاوی ناشرینكردن و ناوزڕاندنمان و تۆمەتباركردنمان بە دزینی پارەی مووچەی كارمەندانی نەخۆشخانە، كە گوایە كوڕانی ئێمە هەستابن بەو كارە نابەجێ و قێزەونە. من لێرەوە بە هەموو دۆستان و خزمان لە سەرتاسەری كوردستان رادەگەیەنم، ئەم جۆرە بڵاوكردنەوانە جگە لە بەشێك لەو ئیرهابە فكریەی كە لەم ناوچەیە لەسەر هەموو ئەندامێك و لایەنگرێكی پارتی هەیە، هیچی دیکە نییە و دوورە لە راستی و بە هیچ جۆرێك ئەو كەسانە كە دەستگیركراون هیچ پەیوەندییەكی راستەوخۆ یان ناڕاستەوخۆ یان بە ئێمەوە نییە.

شاهۆ خالید خولە سوور ئاماژە بەوەش دەكات كە، "‎خەڵكی كوردستان بەگشتی و پارێزگای سلێمانی بە تایبەتی زۆر لەوە وشیار ترن، باش ئەزانن كێ لەم سنوورە لە پشتی دروستكردنی باندودزین و تاڵانكردن و پیاو كوشتنەوەن، ئایا ئێمە و بنەماڵەكەمان و عەشیرەتەكەمانین یان ئەوانەن كە لە پشتی دروستكردنی ئەم تۆمەتە ناشرین و ناڕەوایانەن بۆ ئێمە".

بەیانی ئەمڕۆ  13ی ئازاری 2019، بەڕێوەبەری ئاسایشی سلێمانی لە کۆنگرەیەکی رۆژنامەوانی هاوبەشدا لەگەڵ دەزگا ئەمنییەکانی پارێزگای سلێمانی رایگەیاند ''ئەو حەوت کەسەی لەسەر رووداوی دزینی پارە و مووچەی نەخۆشخانەی شار لە سلێمانی دەستگیرکراون سەر بە هیچ لایەنێکی سیاسیی نین و پێشتر چەند جارێک فەرمانی دەستگیرکردنیان بۆ دەرچووە''. 

بەڕێوەبەری ئاسایشی سلێمانی دەڵێت: "80%ی ئەو باندە کۆنەپیاوکوژ، دز و چەتەن بوون و لەنێو زیندان پێشتر یەکدیان ناسیووە، بەهیچ شێوەیەک سەر بە هیچ لایەنێکی دیاریکراو نین''.