ڤیدیۆ؛ نەوشیروان مستەفا: پارتی و حزبەكانی تر خەریكە سوارى ملمان ئەبن

4115 جار خوێندراوەتەوە کات02:23 بەروار09-04-2019
ڤیدیۆ؛ نەوشیروان مستەفا: پارتی و حزبەكانی تر خەریكە سوارى ملمان ئەبن

راچڵەكین-

لەتۆمارێكی ڤیدیۆییدا ( نەوشیروان مستەفا) رێكخەری پێشووی بزوتنەوەی گۆڕان، لەپەیوەندییەكی تەلەفۆنیدا لەگەڵ كەسێكی تر دەڵێت:" پارتی و حزبەكانی تر خەریكە سوارى ملمان ئەبن."

لەو تۆمارە ڤیدیۆییەدا كە لەفەیسبووكی (ئارام ئەحمەد) وەرگیراوە، نەوشیروان مستەفا بەنیگەرانییەوە بەو كەسەی كە قسەی لەگەڵدا دەكات دەڵێت:" ڕەنجی خۆی بچنێتەوە... وایلێهاتووە ئێسنا جنێو بەیەكتری دەدەن و موئامەرە دەكەن و رێگەكەیان خۆشكردووە بۆ پارت و حزبەكانی تر خەریكن ئەوان سورای ملمان دەبن.

دەشڵێت:" منیش بیئومێد بووم نەك هەر خەڵك."

لەبەرامبەر بڵاوبوونەوەی ئەو ڤیدۆیەدا، عەلی حەمەساڵح- سەرۆكی فراكسیۆنی گۆڕان لەپەرلەمانی كوردستان لە بابەتێكدا بەناوی " درۆو جاسوسی بەسەر كاك نەوشیروانەوە" كەلە فەسبووكی خۆی بڵاویكردووەتەوە، باس لەناوەڕۆكی ڤیدۆكەو مێژووەكەی دەكات.

 عەلی حەمەساڵح دەڵێت:" مێژوی ئەم ڤیدۆیە١١ی ئۆكتۆبەر ٢٠١٦ یە، ئەو شەوەی ناوەندی بڕیار لە یەكێتی ڕاگەیەندرا، كاك نەوشیروان بەشتێكی خراپی زانی، نەیهێشت بەیەك دێڕیش لە KNNبڕوات."

دەشڵێت:" بەیانیەكەی چوینە خزمەتی زۆرێك لە برادەرانی دەستەی ڕاوێژی گۆڕان لەوێ بوو، نیگەران بوو لەو دۆخە، پێی وابوو ئەنجامی ئەم ناوەندی بڕیارە تێكدانی ڕێككەوتنی گۆڕان و یەكێتیە( واش دەرچوو، دواتر هەمویان پێكهاتنەوەو ڕێككەوتنەكە نەما)."

لەبەشێكی تری نووسینەكەدا هاتووە:" قەلەق بوو، دەیگوت: هەردولایان چەكداریان هەیەو هەست بە بەرپرسیاریەتی ناكەن، ناشمانەوێت كێشە بخەنە سلێمانی."

عەلی حەمەساڵح دەڵێت:"ڕۆژێك دوای ڕاگەیاندنی ناوەندی بڕیار، كاك نەوشیروان نیگەرانی دۆخەكە بوو، وتم: كاكە ئەم دۆخە هەیەو تۆش دەڕۆیت بۆ لەندەن..وتی: زۆرم پێناچێت زوو دەگەڕێمەوە! بەداخەوە نەیتوانی زوو بگەڕێتەوەو دواتریش بەو دۆخە گەڕایەوە."

ئەو پەرلەمانتارەی گۆڕان دەڵێت:" چ شەرمێكی گەورەیە، میوانی ماڵی كاك نەوشیروان بیت و بە دزی خۆیەوە تەسویری بكەیت و دواتر بیدەیتە یەكێ تر بڵاوی بكاتەوەو بەشێكی ببڕیت و ناوەڕۆكەكەی بگۆڕیت."

زیاتر دەدوێت:" ئەم ڤیدۆیە هەفتەیەك دوای دروستبوونی ناوەندی بڕیارە. ئەوەشی تەلەفون دەكات ئەندامێكی دەستەی كارگێڕی مەكتەبی سیاسی یەكێتیە. ئەوەی دەڵێت: ڕەنجی خۆی بچنێتەوە، مەبەستی ڕەنج و ڕێككەوتنەكە بوو."

"ئەوەی دەڵێت: جنێو بەیەك دەدەن و موئامەرە لەیەك دەكەن، مەبەستی ئەو دۆخەی ئەو كاتی یەكێتیە!هەموو كەس دەزانێت لەو كاتەدا هیچ گرفتێك لە گۆڕاندا نەبوەو تائێستاش هیچ كام لە كەسە دیارەكانی گۆڕان جنێو بێ ڕێزیان بەیەك نەكردوە!"

"ئەوەشی دەڵێت بێ ئومێد بووم، بێ ئومێد بوونە لە ڕێككەوتنی گۆڕان و یەكێتی، نەك لە سیاسەت و گۆڕان."

عەلی حەمەساڵح دەڵێت:" ئەوەی بە دزیەوە تەسویری كردوە، خیرەتی هەبا بەناوی خۆیەوە دایدەناو هیچیشی لێ نەدەبڕی و ناوی ئەو مەكتەب سیاسیەی یەكێتیشی بڵاودەكردەوە كە تەلەفونی بۆ كاك نەوشیروان كرد.جا ئەم كابرا، جار جار وتار دەنووسێت و یاسی ڕێبازی كاك نەوشیروان دەكات!."

 پەرلەمانتارەكەی گۆڕان دەڵێت:" ڕێبازی كاك نەوشیروان جاسوسی بەسەر كاك نەوشیروان و بڕینی ڤیدۆو درۆكردن و ناردنی ڤیدۆكە نیە بۆ خەڵكی دیكە بڵاوی بكاتەوە."

عەلی حەمەساڵح لە كۆتایی نووسینەكەیدا دەڵێت:" چەندین بەڵگەی ڤیدۆیی دیكەی كاك نەوشیروان هەیە باسی زۆر كەسایەتی سیاسی و چەند دۆخێك دەكات، بە ئاگایی خۆشی وێنەگیراوە، بەڵام ئەخلاقی سیاسیمان تائێستا ڕێگای پێنەداوین هیچی بڵاوبكەینەوە."