پەروین بووڵدان: پێكەوە كۆتایی بە گۆشەگیری دێنین

69 جار خوێندراوەتەوە کات12:42 بەروار15-05-2019
پەروین بووڵدان: پێكەوە كۆتایی بە گۆشەگیری دێنین
راچڵەكین-

هاوسەرۆكی گشتیی هەدەپە ڕایگەیاند، دەبێ دەمودەست كۆتایی بە گۆشەگیری بێت. كێشەكە كێشەی هەموو گەلانی توركیایە، ئەگەر لایەنگری دەسەڵات نەبیت ئەوا گۆشەگیر دەكرێیت.

 پەروین بووڵدان، لەووتەیەكدا لە كۆبوونەوەی هەفتانەی فراكسیۆنی هەدەپە لە پەرلەمانی توركیا پێشكەشیكرد ووتی، ئەوان لە وڵاتێكدان كە دادپەروەری و دیموكراتی تێدا گۆشەگیركراوە.

ئاماژەی بەوەشدا:" گۆشەگیری تەنیا لە بەندیخانەكان نییە بەڵكوو لە دەرەوەش هەیە. ئێمە بەگشتی گۆشەگیر كراوین. ئەگەر ئێوە لایەنگری دەسەڵات نەبن ئەوا گۆشەگیر دەكرێن."

روونیكردەوە: پەرلەمانتاری ئێمە لەیلا گیوڤەن ١٨٨ رۆژە لە دژی گۆشەگیری لە مانگرتندایە. هەروەها زیاتر لە ٣٠٠٠ زیندانیی سیاسی لە مانگرتندان كە گەورەترین چالاكی مانگرتنە لە مێژووی كۆمار. ٣٠٠ زیندانیی سیاسیش چالاكی خۆیان گۆڕی بۆ ڕۆژووی مردن."

بووڵدان، لەبەشێكی تری ووتارەكەیدا ئاماژەی بە چاوپێكەوتنی پارێزەران لەگەڵ عەبدوڵا ئۆجالان-ی ڕێبەری زیندانیكراوی پەكەكە كردو ووتی:" پەیامی ئیمڕاڵی زۆر گرنگە. ئەو بانگەوازەی گفتوگۆ بۆ ئەوەی قۆناغێكی نوێ دەستپێبكات هیوایەكی نوێیە. بۆ ئەوەی دانوستانی دیموكراتی دەستپێبكات، ئەرك دەكەوێتە سەرشانی هەموو دیموكراتیخوازان. ئێمە بانگی هەموو كەسانی ئاشتیخواز و دیموكرات دەكەین كە بێدەنگ نەبن. داواكاریی هەڵگرتنی گۆشەگیری داواكارییەكی ڕەوا و قانوونییە. ئەگەر ئەو داواكارییە جێبەجێ بكرێت ئەوا لە بواری كۆمەڵایەتی ئارامییەك دێتە ئاراوە. ئەگەر ئەو داواكارییە بەدیبێت و گۆشەگیری هەڵبگیرێت، وڵات هەناسەیەك دەدات. دەبێ بەزووترین كات گۆشەگیری هەڵگیرێت. ئێمە وەك هەدەپە بەڵێن دەدەینە ئەو دایكانەی كە ئەمڕۆ هاتوونەتە ئێرە. گۆشەگیری تەنیا پەیوەندی بە ئێوە نییە بەڵكوو پەیوەندی بە هەموو ئەو گەلانەوە هەیە كە لە توركیا دەژین. ئێمە هەموومان پێكەوە تێدەكۆشین. گۆشەگیری هەڵدەگرین و وا دەكەین ڕۆڵەكانتان بژین."