خەڵكی ئێران لە گرانی زیاتر دەترسن وەك لە جەنگ

141 جار خوێندراوەتەوە کات09:42 بەروار22-05-2019
خەڵكی ئێران لە گرانی زیاتر دەترسن وەك لە جەنگ
راچڵەكین 
 
پەیامنێری ئاژانسی ئاسۆشێتدپرێس لە سەردانێكی مەدانی تارانی پایتەختی ئێرانی بەسەر كردۆتەوە و لە نزیكەوە گوێی لەرٍا و بۆچوون و گلەیی و گازندەی هاووڵاتیانی ئێرانی بووە و ڕایگەیاندووە كە خەڵكی ئێران زیاتر نیگەرانی گرانین تا جەنگ و هاوكات داوا دەكەن كە واشنتۆن و تاران لەسەر مێزی گفتوگۆ دابنشین و كێشەكانیان چارەسەر بكەن، چونكە ڕۆژ لە دوای ڕۆژ بارودۆخی ئێران بەرەو خراپی زیاتر دەڕوات.

 

 
لەو كاتەوە كە ئەمریكا لە ڕێككەوتنە ئەتۆمییەكەی دەرچووە و سزاكانی ئەمریكا لەدژی ئێران دووبارە دەستیان پێكردۆتەوە، ئابووری ئێران تووشی قەیرانێكی گەورە بۆتەوە و خەڵك لەگەڵ گرانی دەست و پەنجە نەرم دەكەن بەشێوەیەك كە دابینكردنی پێداویستی ڕۆژانە لە ڕوونەوە بگرە هەتا گۆشت سەخت بووە و ڕۆژ بە ڕۆژ سەختر دەبێت. 
 
پەیامنێرەكە باس لەوەشدەكات كە زۆربەی ئەو خەڵكانەی كە قسەی لەگەڵ كردوون پێیانوایە كە لەنێوان ئەمریكا و ئێران جەنگ ڕوو نادات و ئەگەر جەنگ ڕوو بدات ئەوان بەرگری لە خاك و نیشتمانی خۆیان دەكەن. 
 
زۆربەی ئەوانەی لێدوانیان بۆ ئاژانسی ئاسۆشێتدپرێس داوە دەڵێن پێیانوایە دەبێت ئێران لەگەڵ ئەمریكا دانوستان و گفتوگۆ بكات، هەرچەند هەندێكیان لایان وایە كە دۆناڵد ترەمپ سەرۆكی ویلایەتە یەكگرتووەكانی ئەمریكا جێی متمانە نییە و قابیلی ئەوەش نییە كە پێشبینی بكەیت. 
 
ئەفرا- ی تەمەن 20 ساڵان كە خوێندكارە دەڵێت: دۆناڵد ترەمپ جێی متمانە نییە و هەڵسوكەوتی قابیلی پێشبینی نییە و هیچ كەسیش نازانیت كە پەرچەكرداری پێویست و گونجاو لەبەرامبەر ترەمپ چیی ؟ دەشڵێت: ئەمریكا ئابووری جیهانی كۆنترۆڵ كردووە و ئێمە بژارێكی زۆرمان لەبەردەستدا نییە. 

 

 
زۆهرە تەمەن 51 ساڵان و كابانی ماڵەوەیە، حیجابی كردووە و لە نوێژی هەینی دەگەڕێتەوە و دەڵێت: ئەمریكا هیچ كارێكی پێناكرێت ئەگەر پێی كرابوایە تا ئێستا كردبووی. 
 
مەعسومە تەمەنی 35 ساڵان و فەرمانبەرە، دەڵێت: كاتێك كە كەسێك كە هەوڵ دەدات بترسێنێت، مانای ئەوەیە كە ئەو هێشتا بۆ جەنگ ئامادە نییە، چونكە بەڕاستی ئەگەر كەسێك حەزی لە جەنگ بێت بەبێ سێ و دوو لێكردن دەستپێدەكات و پێویستی بە شێر و ڕێوی هێنانەوە نییە، هەر وەك شەڕی عیراق كاتێك كە عیراق هێرشی كردە سەر ئێران. ئەو پێی وایە ئەمریكا بە ناردنی كەشتی جەنگی بۆ كەنداو تەنها دەیەوێت ئێران بترسێنێت. 
 
محەمەد عەلی دانیشتوی گەڕەكی جەوادییە لە باشووری تاران، ئەو لەشەڕی ئێران و عیراق بەشداری كردووە و كەم ئەندامە، دەڵێت: ئەگەر لەنێوان ئەمریكا و ئێران جەنگ ڕوو بدات دووبارە دەچێتەوە بۆ بەرەكانی شەڕ و تەنانەت سێ كوڕ و نەوەكانی هان دەدات بچن بۆ جەنگ. 
 
ئارەزوو ژنێكی تەمەن 37 ساڵان و دایكی دوو منداڵە، ئەو دەڵێت: پێموایە دەبێت حكومەت بۆ ئەوەی جەنگ ڕوو نەدات بیر بكاتەوە و ڕێگری لەسەرهەڵدانی جەنگ بكات، ئەگەر جەنگ باش بوایە ئێستا دۆخی عیراق و ئەفغانستان ئاوا نەدەبوو. 
 

 

جەعفەر شۆفێری تەكسییە و تەمەنی 34 ساڵانە، سەبارەت بە ئەگەری جەنگی نێوان ئەمریكا و ئێران دەڵێت: ئەگەر جەنگ ڕوو بدات هەردوولا دۆڕاو دەبن، خەڵكی عاقڵ و ژیر هەم لە ئێران و هەم لە ئەمریكا خوازیاری ئاشتی و ئارامین نەك جەنگ. 
 
زۆربەی ئەو كەسانەی كە لەگەڵ پەیامنێری ئاسۆشێتدپرێس قسەیان كردووە ئاماژەیان بە دۆخی خراپی ئابووری ئێران و خێزانی ئێرانی كردووە و زیاتر لەوەی كە نیگەرانی جەنگ بن نیگەرانی گرانی بوون. 
 
خاتوو سادقی كە ژنی ماڵەوەیە لەوبارەیەوە دەڵێت: دۆخی ئابووری ئێران زۆر زۆر خراپە، زۆربەی خەڵك بێ ئیش و كارن، ئەوانەی كە ئیش و كاریشیان هەبووە لەم ماوەیەدا كاروئیشی خۆیان لەدەستداوە. بە وتەی خاتوو سادقی زۆربەی گەنجان بێكارن و ئیش و كارێكی گونجاویان دەست ناكەوێت و ناتوانن هاوسەرگیری بكەن یان سەربەخۆ بن.  
 

 

 

خاتوو مالیكی تەمەن 62 ساڵان و خانەنشین كراو دەڵێت: ئێران دەبێت لەگەڵ ئەمریكا دانوستان بكات هەر وەك خەڵكی دیكە و وڵاتی دیكە كردوویانە، هەڵبەت ئێران دەبێت بە بوێری و هێزەوە لەگەڵ ئەمریكا لەسەر مێزی گفتوگۆ دابنیشێت. چونكە ئێران هیچ بژارێكی دیكەی لەبەردەستدا نییە. 
 
 ڕەزا تەمەن 51 ساڵانە و فەرمانبەرە، ئەو دەڵێت: ئەمریكا دەبێت دووبارە بگەڕێتەوە بۆ ڕێككەوتنە ئەتۆمییەكە و ڕێزی واژۆی خۆی بگرێت كاتێك كە پێشتر ڕێككەوتنەكەی واژۆ كردبوو. ئەگەر ئەمریكا نەگەڕایەوە بۆ  ڕێككەوتنەكە هەق وایە ئێرانیش لە ڕێككەوتنەكە پاشگەز بێتەوە. دەشڵێت: كاتێك كەسێك جارێك دوو جار پابەندی بەڵێنەكانی خۆی نەبوو، تۆش هەر جارێك و دوو جار تەحەمول دەكەی ، خۆ ناكرێت تا قیامەت ئەم دۆخە هەر وا بێت، ئێران دەبێت هەڵوێست لەخۆی نیشان بدات و پێموایە وا باشترە ئێرانیش لەڕێككەوتنە بچێتە دەرەوە. 
 
زۆربەی ئەو گەنجانەی كە لەساڵی 2015 دوای ئەوەی ڕێككەوتنە ئەتۆمییەكەی لەنێوان ئێران و وڵاتانی خۆرئاوایی واژۆ كرا لەخۆشیان ڕژانە سەر شەقامەكان و ئاهەنگی خۆشیان گێڕا، لەئێستادا هەر ئەو گەنجانە دەڵێت ئەو ڕێككەوتنە مردووە و دەبێت بینێژین. زۆربەی ئەو گەنجانە دەڵێن لەبیری ئەوەداین كە وڵات بەجێبهێڵین و لە شوێنێكی دیكەی ئەم جیهانە ژیان دەست پێبكەینەوە، چونكە لەئێستادا لە ئایندەی خۆیان نیگەرانن. 

 

 

 
 یەكێك لەو گەنجانە كە تەمەنی 20 ساڵانە و ناوی خۆی ناڵێت سەبارەت بە دۆخی ژیان لە ئێران دەڵێت: ئایندەیەكی نادیاری هەیە و لە ئایندەی خۆی نیگەرانە و ناتوانێت پلان بۆ ئایندە دابنێت و لە ئێستا تەنها كارێك كە لەدەستی دێت ئەوەیە كە چارەیەك بدۆزێتەوە بۆ ئەوەی لە ئێران بڕوات و لە وڵاتێكی دیكە ژیان بۆ خۆی دروست بكات.