دووكەڵ تانجەرۆ دەخنكێنێت

114 جار خوێندراوەتەوە کات05:25 بەروار08-07-2019
دووكەڵ تانجەرۆ دەخنكێنێت

راچڵەكین: ئاوات خەیروڵڵا 

هەشت رۆژە دوكەڵی سوتانی خۆڵ و خاشكی پاشماوەكانی سلێمانی ئاسمانی ناوچەی تانجەرۆی تەنیوەو تائێستا تیمەكانی بەرگری شارستانی و شارەوانی نەیانتوانیوە كۆنترۆڵی بكەن. دانیشتوانی ئەو ناوچەیەش دادو بێدادیانە لەوەی قەدەری ئەوان بۆ دەبێت هەڵمژینی ئەو دوكەڵ و بۆن و بەرامە ناخۆشە بێت كە بووەتە دەردەسەری بۆیان و تووشی جۆرەها نەخۆشی كردوون.

"دەبوو دوكەڵەكە كۆتایی پێی بهاتەیە"

 زەردەشت رەفیق وتەبێژی سەرۆكایەتی شارەوانی سلێمانی دەڵێت،  ماوەی چەند رۆژێكە ئاگرەكەی تانجەرۆ كۆنترۆڵكراوە بەڵام دوكەڵەكەی ماوە، ئەویش دەبێت بەخۆڵ چارەسەر بكرێت. 

وتیشی، سەرۆكی شارەوانی دوو هەزارو 500 بارهەڵگر  خۆڵی داواكردووە بۆ نەهێشتنی ئەو دووكەڵە و گرنگی زیاتریش بەشێوازی فڕێدانی ئەو خۆڵ  و خاشاكانەی سلێمانی بدرێت. 

وتەبێژی سەرۆكایەتی شارەوانی سلێمانی باسی لەوەشكرد، دەبوو دوكەڵەكە كۆتایی پێبهاتەیە بەڵام لەئێستادا بەرەو ئەو قۆناغە دەچێت.

پێشی وایە كە تەنها چارەسەر بۆ دووبارەنەبوونەوەی ئەو ڕووداوە، ریسایكلینە هەربۆیە كۆمپانیایەكی ریسایكلین مۆڵەتی پێدراوە كە لەماوەی  ساڵ و نیوێك دابمەزرێت و كۆتایی بەمشێوازی خۆڵ و خاشاك فڕێدانە بهێنرێت. 

 

"ئاگر و دوكەڵەكە بە بەرگری شارستانی كۆنترۆڵ  ناكرێت"

رێكان جەلال وتەبێژی بەرگری شارستانی سلێمانی بەراچڵەكین-ی وت، ماوەی  هەشت رۆژە ئەو ئاگرە بەئاسمانی سلێمانیەوەیەو تیمەكانی بەرگری شارستانیش لەنزیك شوێنەكەن.
 
وتیشی، تەنها چارەسەر، بەو خۆڵە دەكرێت كە شارەوانی ئەنجامی دەدات  ئەگەر نا ئیشی ئاو نییە هەرچەندە تیمەكانی ئەوان لەوێن. 

وتەبێژی بەرگری شارستانی سلێمانی باسی لەوەشكرد، دووكەڵێكی زۆرهەیە و ژینگە پێس دەكات و زیانی بۆ تەندروستی مرۆڤیش هەیە،  بەڵام دەبوو پێشتر چارەسەركرایە و چینێك خۆڵ و چینێك ئەو خاشاكە دانرایە پاشان چینێكی دیكە خۆڵ. 

پێشی وایە كەمتەرخەمی زۆری هەبووە، ئەوەش وایكردووە  شاخێكی پاشماوە دروست بێت و  دوكەڵەكەش غاز دروست بكات كە پەشماوەی چەند ساڵێكە.


 

"ئەگەربێت و بەشێوەیەكی زانستی ئەم پاشماوانە فڕێ بدرێت زیانە تەندروستییەكانی كەمتر دەبێت"

 
مەعروف مەجید سەرۆكی رێكخراوی ئایندە بۆ پاراستنی ژینگە بەراچڵەكین-ی وت، سەرەرای فڕێدانی خۆڵ و خاشاك لەتانجەرۆ لەسلێمانی و كانی قرژاڵە لەهەولێر بەشێوەیەكی زۆر نازانستییانە چەندجارێك ئاگری تێبەردراوە بووەتە هۆكاری پیسبونی ژینگە و هەوا و بینین و هەروەها پیسبونی زەوییە كشتوكاڵییەكانی ئەوسنورانە كە دوكەڵەكەی دەچێتە سەر سەرچاوەی ئاوی ئەو شوێنانە.

  
دەشڵێت، دەبێت بپرسین بۆچی زبڵ و خاشاك بەمشێوەیە فڕێ دەدرێت كەئەویش ئەوەیە بەداخەوە تائێستا لەهەرێمی كوردستان و ئامارە فەرمییەكان رۆژانە  زیاتر لەحەوت هەزار تۆن پاشماوە فڕێ دەدرێت لەناو ئەو رێژەیەش لەسەدا 40 بۆ 50 پاشماوەی شوێنە گشتییەكانە كەئەوەش مەترسی دروست دەكات. 

سەرۆكی رێكخراوی ئایندە بۆ پاراستنی ژینگە پێشی وایە، ئەگەربێت و بەشێوەیەكی زانستی ئەم پاشماوانە فڕێ بدرێت زیانە تەندروستییەكانی كەمتر دەبێت  و جارێكی دیكە دەبێتە سەرچاوەی ئابوری  بۆ تاك و هەم حكومەت و لەهەمانكاتیشدا هەلی كار بۆ كۆمەڵێك كەس دروست دەكات. بەڵام بەداخەوە بەهۆی ئەوەی حكومەت خەمی ژینگە و خەڵكی نییە ئەم شێوەی دروستكردووە. 


"لەهیچ شوێنێكی دنیادا نییە كە زەوی پاك بكەیتەوە بەڵام ئاسمان لەخەڵك پیس بكەیت"

مەعروف مەجید ئەوەش دەخاتە ڕوو، وەكو رێكخراوەكەمان داوامان كردووە كە رێكخراوە ژینگەییەكان لەسنوری پارێزگای سلێمانی گردبونەوەیەك بكەین و بچینە شوێنی پاشماوەكە لەتانجەرۆ  و داوابكەین كە ناكرێت پایتەختی رۆشنبیری بەمشێوەیە بەیانیان  یان شەوان بكەوێتە ژێر دوكەڵێكی ناشرین و ژینگە پیس بكات. 

رونیشیكردەوە، "لەهیچ شوێنێكی دنیادا نییە كە زەوی پاك بكەیتەوە بەڵام ئاسمان لەخەڵك پیس بكەیت  بەڵام لەهەرێمی كوردستانی ئێمە حكومەت و كۆمپانیاكان زەوی بۆ خەڵك پاك دەكەنەوە  بەڵام ئاسمانمان لێ پیس دەكاتەوە". 

ئەوەش لەكاتێكدایە، لەبەشێك لەوڵاتانی پێشكەوتو فڕێدانی خاشاك و پاشماوەی هاوڵاتیان  جارێكی دیكە ریسایكلین دەكرێت و جیاوا لێرە كە دەكرێتە ژێر خۆڵ یاخو دەسوتێنرێت كەبەوتەی شارەزایان زیانی تەندروستی بۆ هاوڵاتیان هەیە.