عەلی بەشار سزا درا

2479 جار خوێندراوەتەوە کات10:32 بەروار12-07-2019
عەلی بەشار سزا درا

راچڵەكین-
دادگایەكی ئەڵمانی سزای زیندانی هەتاهەتایی بەسەر" عەلی بەشار" ئەو گەنجە كوردەدا سەپاند، كە تاوانبارە بە كوشتنی كچێكی ئەڵمانی بەناوی "سوزانا فێلدمان"ی تەمەن 14 ساڵ.

دادگایەكی ئەڵمانی لەشاری ڤیسبادن، رۆژی 10ی ئەم مانگە، بڕیاریداوە بە سەپاندنی سزای هەتاهەتایی بەسەر عەلی بەشار-ی تەمەن 23 ساڵە كە خەڵكی زاخۆ-یە لە باشوری كوردستان.

بەپێی زانیارییەكانی داواكاری گشتی، "عەلی.ب" لەكۆتایی ئایاری 2018دا دوای ئەوەی لەیەكێك لەدارستانەكانی شاری ڤیسبادن دا ئەشكەنجەی (سۆزانا)ی تەمەن 14 ساڵانیدا بوو، دەستدرێژی سێكسیشی كردووەتەسەری، دواتر بەشێوەیەكی "دڕندانە" كوشتوویەتی، دواجار لەحوزەیرانی 2018 دا تەرمەكەی دۆزرایەوە.

" عەلی.ب" دوای ئەنجامدانی تاوانەكە لەگەڵ خێزانەكەیدا بە بەڵگەی ساختەوە توانیبوی لەفڕۆكەخانەی دوسڵدۆرفەوە خۆی دەربازكات و خۆی بگەیەنێتەوە هەولێری پایتەختی هەرێمی كوردستان، دواتر بچێتە ناوچەی بادینان.

لەسەر داوای حكومەتی ئەڵمانیا و هەماهەنگی لەگەڵ هێزەی ئەمنییەكانی هەرێمی كوردستان، رۆژی 8ی حوزەیرانی پۆلیسی دهۆك، عەلی بەشاری لە شارۆچكەی زاخۆ دەستگیركرد و رادەستی حكومەتی ئەڵمانیای كرد.

عەلی بەشار لە بەردەم دادوەر، دانی بەوەدا نا كە مانگی ئایاری 2018 كچەكەی كوشتووە، بەڵام ئەوەشی وتووە كە نازانێت چۆن ئەوە روویداوە. هەروەها رەتیكردووەتەوە دەستدرێژی سێكسیی كردبێتەسەر سوزانا.

عەلی برا گەورەی پێنج برایە، سێ‌ خوشكی لە خۆی گەورەتری هەیە. دوو لە خوشكەكانی شوویان كردووە و لە ئەڵمانیان، عەلیش لە تشرینی یەكەمی 2015 چووەتە ئەڵمانیا.  دایكی عەلی عەرەبی فەللوجەیە و شووی بە پیاوێكی كوردی خەڵكی زاخۆ كردووە.