‏‎لە ساڵیادی شەهیدبوونی فاروق جەباری باوكمدا

452 جار خوێندراوەتەوە کات04:16 بەروار05-09-2019
‏‎لە ساڵیادی شەهیدبوونی فاروق جەباری باوكمدا

‏‎باڤێ فاروق جەبار

‏‎بیست و سێ ساڵ لەمەوبەر، ئەوكاتەی تەمەنم چوار ساڵان و باسنێی خوشكم دوو ساڵ و بوێری برام تەنها ساڵێك تەمەنی بوو، هەواڵی جەرگبڕی شەهیدبوونی باوكم تاساندمانی، شۆكی كردین. 

‏‎ئەوسا و ئێستاش بۆ ئێمە زۆر قوڕس بوو باوەڕ بەم هەواڵە بكەین، وا ڕاهاتبووین، هەر هیچ نەبێ، ئەگەر ڕۆژانەش نەبێ هەفتەی ٢-٣ جار باوكم ببینین و لەباوەشی پڕ سۆزو موحیبەتی خۆی بمانلاوێنێ، قوڕس بوو بۆ ئێمە ئێوارە دابێ و بابە نەیەتەوە ماڵ، قوڕس بوو شەو بخەوین و بابە ماچێكمان نەكا.

‏‎بۆ من لە هەموویان قوڕستر بوو، كە باوكم نەدەهاتەوەو هەر چاوەڕوان بووین، باسنێ و بوێر سەیریان دەكردم، وەك بڵێی هەموویان باوكم لە چاوی من ببینن، دایكم و خزم و كەسوكاریش زۆر زیاتر بایەخیان بەمن دەدا، ئەوسا نەمدەزانی بۆ؟ ئێستا خەریكە تێدەگەم هەموو دەیانەوێ ئێمە ببینە فاروق جەبارو شوێنی بگرینەوە، بەڵام قوڕسە زۆر!

‏‎لاتان سەیر نەبێ خەمی لە دەستدانی فاروق جەبار ئەوەندە گەورە بوو، لەبەر دۆست و برادەر، هاوڕێ و هاوسەنگەر، پێشمەرگەو كەسوكاری شەهیدان، خەمەكە بەر ئێمە نەدەكەوت و زۆركات لەبەرامبەر خەمباری ئەوان ئێمە دەستەوەستان بووین و نەماندەزانی چی بكەین، چاوەڕێ بووین ئەوان دڵمان بدەنەوەو ئەوانیش چاوەڕێ بوون ئێمە دڵنەواییان بكەین و پێیان بڵێین بێ خەم بن ئەوە ئێمە هەین و لێرەین، هەر هیچ نەبێ بۆنی فاروق جەبارمان لێدێ.

بەهەرحاڵ ڕۆژگار ڕۆیشت و هەموومان باوەڕمان كرد كە فاروق جەبار لە شەڕی نەگریسی ناوخۆ شەهید بووە، ئەوەی دوای ئەو مایەوە یادو یادەوەری و سەروەرییەكانی بوو بۆ ئێمە، ئەو سەروەرییانەی كە سەروەتێكی لەبن نەهاتوون و پشتاو پشت وەك شانازی بۆمان دەمێنێتەوە.

‏‎ئەوەی كوڕو كچە شەهید نەبێ ئەستەمە هەستی پێ بكاو تێبگا كە بێ باوكی ئازارێكی چەندە بەسوێیەو ساڕێژبوونی چەندە زەحمەتە، بەڵێ ٢٣ ساڵە ئێمە دوور لەنازی باوكمان دەژین، ٢٣ ساڵە تەنها بەیادو یادگاری فاروق جەبارەكەی هەموومان دەژین، ئەوەی هەرگیزاو هەرگیز نەیهێشتووە هەست بەنەبوونی ئەو بكەین وەفاو دڵسۆزی و خەمخۆری هاوڕێیانی ئەو بووە بۆ ئێمە، بە تایبەت كاكی گەورەمان كاك كۆسرەت، ئەو پیاوەی هەمیشە بۆ ئێمەو ماڵە شەهیدانی تر سایەو سێبەر بووەو نەیهێشتووە هەست بەبێ نازی بكەین.

‏باوكە

‏‎لە دوای ٢٣ ساڵ لە شەهیدبوونت درێژە بەكاروانت دەدەین و بەردەوام دەبین ئەوە پەیمانەو لە ٢٣ ساڵ پێش ئێستا داومانە، ئێستێ تەنها دەتوانم ئەوە بڵێم بابە تكایە كەمێك لە هەست و سۆزی خۆتمان بەرێ، ڕێگەمان بدە وەك تۆ بین و بتوانین خزمەت بكەین و ناوێكی درەوشاوە قابیل بەتۆ دروست بكەین، بەڵێ بۆ ئێمە گەورەترین سەروەرییە كە كچ و كوڕی فاروق جەبارین، بەڵام خۆشترو گەورەتر ئەوەیە هەموو پێمان بڵێن ڕەحمەت لە گۆڕی فاروق وا خەریكن جێگەكەی 
دەگرنەوە و بۆ كوردو كوردستان دەبنە فاروق جەبارێكی تر.

‏‎هەزار سڵاو لەگۆڕی پڕ نورت باوكە
‏‎هەزاران درودو سڵاو بۆ سەرجەم شەهیدانی كوردستان