ئەلبو كەمال؛ ژمارەیەك بارەگای حەشدی شەعبی بۆردومانكران

162 جار خوێندراوەتەوە کات11:14 بەروار09-09-2019
ئەلبو كەمال؛ ژمارەیەك بارەگای حەشدی شەعبی بۆردومانكران

راچڵەكین-

ژمارەیەك بارەگای حەشدی شەعبی لەناوچەی " ئەلبوكەمال"ی سوریا نزیك لە شارۆچكەی قائیم-ی عیراق، لەلایەن فڕۆكەی نەناسراوەو بۆردمانكران، بەو هۆیەوەشەوە ژمارەیەك چەكداری حەشد كوژران و برینداربوون.

میدیا عەرەبییەكان بڵاویانكردووەتەوە، هێرشە ئاسمانییەكان بارەگاكانی (بزوتنەوەی ئیبدال، حەیدەریوون و حزبوڵای عیراق)یان لەناو خاكی سوریا كردووەتە ئامانج و بەهۆیەوە لانی كەم 7 چەكداری حەشد كوژراون و 17ی تریش برینداربوون.

هاوكات روانگەی سوری بۆ مافەكانی مرۆڤ بڵاویكردووەتەوە:" بەهۆی ئەو هێرشانەوە، لانی كەم 18 چەكداری سەر بەئێران و ئەو گروپانەی لێیەوە نزیكن كوژراون."

لە ناوچەی ئەلبوكەمال-ی سوریا هەریەك لە " حزبوڵای لوبنانی، حزبوڵای عیراقی، نوجەبا، فاتمییون، زەینەبییون" بوونیان هەیە كە سەرجەمیان لەلایەن سوپای پاسدرانی ئێرانەوە سەرپەرشتی دەكرێن.

ئەلبوكەمال دەكەوێتە كەناراوی خۆرئاوای ڕووباری فوڕات، لەكاتێدا هەریەكە لەهێزەكانی سوریای دیموكرات و ئەمریكا لە خۆرهەڵات و باكوری فوڕات بوونیان هەیە.