راچڵەكین نوێترین زانیاری لەسەر ژمارەی كاندیدانی خانەی ڕاپەڕاندنی گۆڕان بڵاودەكاتەوە

213 جار خوێندراوەتەوە کات11:48 بەروار11-09-2019
راچڵەكین نوێترین  زانیاری لەسەر ژمارەی كاندیدانی خانەی ڕاپەڕاندنی گۆڕان بڵاودەكاتەوە
راچڵەكین-

ئەندامێكی ژوری هەڵبژاردنی بزوتنەوەی گۆڕان ئاشكرای دەكات، تائێستا 10 فۆڕمی خۆكاندید كردن بۆ خانەی راپەڕاندن پڕكراوەتەوە.

یاسین حەمە عەلی، ئەندامی ژووری هەڵبژاردنی بزوتنەوەی گۆڕان بە(راچڵەكین)ی راگەیاند:"سبەینێ‌ پێنجشەممە 11-9-2019، كۆتایی دێت بە وادەی خۆكاندید كردن بۆ خانەی راپەڕاندن و پۆستی رێكخەری گشتی بزوتنەوەی گۆڕان."

وتیشی"تا ئێستا 10 فۆڕم پڕكراونەتەوە، گەنج و ژنی تێدایە، لە هەموو شارەكانی هەرێمی كوردستانەوە."

ئەو ئەندامەی ژوری هەڵبژاردنی بزوتنەوەی گۆڕان ئاماژەی بەوەكرد، سبەینێ‌ دەستەی نوێی سەرۆكایەتی جڤاتی گشتی بزوتنەوەی گۆڕان دیاری دەكرێت، سەرۆكی جڤاتەكەش راستەوخۆ دەبێتە ئەندامی خانەی راپەڕاندنی بزوتنەوەی گۆڕان.

بەپێی زانیارییەكانی (راچڵەكین) تا ئێستا عومەری سەید عەلی، خۆی كاندید نەكردووەتەوە بۆ پۆستی رێكخەری گشتی بزوتنەوەی گۆڕان، لەبەرامبەردا شۆڕش حاجی، بڕیاری داوە خۆی كاندید بكات.

جڤاتی‌ نیشتمانی‌ بزوتنەوەی‌ گۆڕان بڕیاریداوە رۆژی 14ی ئەیلولی 2019، هەڵبژاردن بۆ ئەندامانی خانەی راپەڕاندن ئەنجامبدرێت كە پێكدێن لە (رێكخەری گشتی، سكرتێری جڤاتی نیشتیمانی، سكرتێری فراكسیۆنەكان، سكرتێری ژوورەكان، سكرتێری باژێڕوانەكان و سكرتێری كاروباری خەڵك) كە ئەمانیش لەناو ئەندامانی جڤاتی نیشتیمانی هەڵدەبژێردرێن و سكرتێری جڤاتی گشتیش لەلایەن ئەندامانی جڤاتی گشتییەوە هەڵدەبژێردرێت و راستەوخۆ دەبێتە ئەندامی خانەی راپەڕاندن.

بەپێی‌ پەیڕەوی‌ ناوخۆی‌ بزوتنەوەی‌ گۆڕان ئەندامانی‌ خانەی‌ راپەڕاندن بۆ دوو ساڵ هەڵدەبژێردرێن، هەرئەندامێكیش بۆ سێ‌ خول دەتوانێت بۆ هەمان پۆست خۆی‌ هەڵبژێرێت.

هاوكات، بزووتنەوەی گۆڕان بڕیاری داوە لە سەرەتای مانگی ١١دا كۆنفرانسی نیشتمانیی خۆی ببەستێت.