هەولێر؛ پارێزگاری نوێ هەڵدەبژێردرێت

36 جار خوێندراوەتەوە کات10:26 بەروار12-09-2019
هەولێر؛ پارێزگاری نوێ هەڵدەبژێردرێت

راچڵەكین-

ئەنجوومەنی پارێزگای هەولێر، ئەمڕۆ پێنجشەممە 12ی ئەیلولی 2019 لەدانیشتنی ئاسایی خۆیدا دەنگ بە پارێزگاری نوێ دەدات.

عەلی رەشید، سەرۆكی ئەنجوومەنی پارێزگای ھەولێر رایگەیاند: "كۆبوونەوەی ئەمڕۆی ئەنجوومەن تایبەتە بە ھەڵبژاردنی پارێزگاری ژمارە 41 بۆ پارێزگای ھەولێر، تاكە كاندید بۆ ئەو پۆستە كاندیدی پارتی دیموكراتی كوردستانە ئەویش د. فرسەت سۆفی-یە." 

وتیشی:" پرۆسەكە لە ئەنجوومەنی پارێزگا تەنھا دەنگدانە، ئەگەر كاندیدەكە بە دەنگی رەھا ھەڵبژێردرا، ئەوكات كۆنووسی كۆبوونەوەكە بە نووسراوێك ئاراستەی ئەنجوومەنی وەزیران دەكرێت لەوێوە بەرزدەكرێتەوە بۆ سەرۆكایەتی ھەرێم دواتر كاندیدی پۆستی پارێزگار لەبەردەم سەرۆكی ھەرێم سوێندی یاسایی دەخوات و فەرمانی ھەرێمایەتی بۆ دەردەچێت و دەبێت و دەستبەكار دەبێت." وەك كوردستان 24 بڵاویكردووەتەوە.

رۆژی 10ی ئەم مانگە، نەوزاد هادی، دوای 15 ساڵ وەك دەستبەكاربوونی لەپۆستی پارێزگاری هەولێر، دەستی لەپۆستەكەی كشاندەوە.

فرسەت سۆفی، كاندیدی پارتی بۆ پۆستی پارێزگاری هەولێر:

ساڵی 1978 لەدایكبووە
دكتۆرای لە یاسای گشتی هەیە 
مامۆستای زانكۆی پۆلەتەكنیكی هەولێر بووە
ئەندامی خوولی چوارەمی پەرلەمانی كوردستان بووە
ئەندامی دەستەی راوێژكاریی یاسایی لە سەرۆكایەتی هەرێمی كوردستان بووە
ئەندامی لیژنەی نووسینەوەی دەستووری هەرێمی كوردستان بووە
ئەندامی لیژنەی باڵای چاكسازی بووە 
سەرۆكی لیژنەی كاتیی پەیڕەوی ناوخۆی پەرلەمانی كوردستان بووە