فەڕەنسا كورسی خوێندنی باڵا.. خولی ڕاهێنان بۆ مامۆستا و فەرمانبەران لە خوێندنی باڵا دابیندەكات

55 جار خوێندراوەتەوە کات03:31 بەروار12-09-2019
فەڕەنسا كورسی خوێندنی باڵا.. خولی ڕاهێنان بۆ مامۆستا و فەرمانبەران لە خوێندنی باڵا دابیندەكات

راچڵەكین-

بەپێی یاداشتنامەیەكی نێوان وەزارەتی خوێندنی باڵا و توێژینەوەی زانستی و باڵیۆزخانەی فەرەنسا لە عێراق كە ماوەی سێ ساڵ دەخایەنێت، حكومەتی فەرەنسا بەهاوكاری وەزارەت، كورسی خوێندنی باڵا/ ماستەر و دكتۆرا و خولی ڕاهێنان بۆ مامۆستا و فەرمانبەران لە دامەزراوەكانی خوێندنی باڵا دابیندەكات.

بەگوێرەی راگەیەندراوێكی نووسینگەی رۆژنامەوانی وەزیری خوێندنی باڵاو توێژینەوەی زانستی حكومەتی هەرێمی كوردستان، ئەمڕۆ پێنجشەممە ١٢/٩/٢٠١٩،  یاداشتنامەیەكی لێكگەیشتن لە نێوان وەزارەتی خوێندنی باڵا و توێژینەوەی زانستی و باڵیۆزخانەی فەرەنسا لە عێراق لەلایەن هەریەك لە (ئارام محمد قادر) و (ئۆلیڤێ دیكۆتێنێز)  بۆ دابینكردنی سكۆلەرشیپی خوێندن بەخەرجی هاوبەش ئیمزاكرا.

وەزیری خوێندنی باڵا لەلێدوانێكی رۆژنامەوانیدا ئاماژەی بەوەكرد:" ئەمڕۆ رۆژێكی گرنگ و مێژویە كاتێك ئەم یاداشتنامەیە ئیمزا دەكەین و دەرفەتی خوێندن فەراهەم دەكات بۆ مامۆستایان و فەرمانبەران و خوێندكاران، چونكە هەموشمان لەوە تێدەگەین كە سیستمی خوێندنی فەرەنسا سیستمێكی پێشكەوتو و مۆدێرنە، ئەوەش بۆ ئێمە جێگەی بایەخە، هیوادارین دەرفەتی باش بڕەخسێندرێت بۆ خوازیارانی خوێندنی باڵا و پەرەپێدانی توانا مرۆییەكان لە كوردستان."

لەبەرامبەردا (ئۆلیڤێ دیكۆتێنێز) كونسوڵی گشتی فەرەنسا لە هەرێمی كوردستان لە وتەیەكدا ڕایگەیاند:" لە ڕابردودا پرۆژە هاوبەشەكانمان لەسەرجەم سێكتەرەكان لەگەڵ حكومەتی هەرێمی كوردستان سەركەوتنی بەدەستهێناوە، بۆ ئێمە گرنگە پەرۆشی وەزارەتی خوێندنی باڵا بۆ دیاریكردنی كاندیدەكان لە پێناو سەرخستنی پڕۆژەكە، وتیشی: ئەم گرێبەستە لە داهاتودا ژینگەیەكی گونجاو دروست دەكات، كە دەبێـتە زەمینە و سەرچاوەیەكی باش بۆ پێشكەوتنی ئاستی زانستی زانكۆكان."

مەبەست لەئیمزاكردنی ئەم یاداشتنامەیە، دەستنیشانكردنی مەرج و رێنماییەكانی بەرنامەی سكۆلەرشیپەكەیە، كە خەرجییەكانی بەهاوبەشی هەردولا لەئەستۆی دەگرن، ئەویش بۆ باشتركردنی توانای توێژەر و مامۆستا و خوێندكارانی هەرێمی كوردستان.

بەپێی یاداشتنامەكە خوێندنی تەرخانكراو بریتیە لە خوێندنی ماستەر و دكتۆرا، توێژەرانی دوای بەرنامەی دكتۆرا، ئەندامانی دەستەی وانەبێژان و فەرمانبەرانی ئەندازیار و كارگێری و تەكنیكی.

لەبارەی كاتی پێشكەشكردن بۆ بەرنامەی سكۆلەرشیپی فەرەنسا، بە پێی خاڵێكی نێو یاداشتنامەكە، ڕاگەیاندن بۆ پێشكەشكردنی بەرنامەكان لە (٣٠/١١/٢٠١٩) دەست پێدەكات و مەرج و ڕێنماییەكان بۆ هەریەك لە جۆرەكانی خوێندن دەستنیشان دەكرێت و، دواتریش هەڵبژاردنی كاندیدەكان لە ڕێگەی لیژنەیەك لە وەزارەتی خوێندنی باڵا بەئەندامیەتی نوێنەرێك لە باڵیۆزخانەی فەرەنسا لە بەغداد ئەنجامدەدرێت.

هەر بەپێی ناوەڕۆكی یاداشتنامەكە باڵیۆزخانەی فەرەنسا پشتگیری ئەم بەرنامەیە دەكات لە ڕێگەی دابینكردنی بلیتی فرۆكە و بیمەی تەندروستی و كرێی خوێندن، كە لە لایەن حكومەتی فەرەنسا دیاری كراوە، لە بەرامبەریشدا وەزارەتی خوێندنی باڵا و توێژینەوەی زانستی بژێوی ژیانی خوازیاران (بە پێی ئەم پێوەرانەی كە جێبەجێ دەكرێت لە سەر خوێندكاری بیانی)، دابیندەكات.