گەورەكردنی "سمت"..لەنێوان مەترسیی و ئارەزوودا

362 جار خوێندراوەتەوە کات07:34 بەروار07-10-2019
گەورەكردنی

راچڵەكین ـ فەرهەنگ فەرەیدون

رێژەی ئەنجامدانی نەشتەرگەری گەورەكردنی "سمت" لەنێو خانمانی هەرێمی كوردستان روو لە زیادبوونە، كچە مۆدێل و تۆڕە كۆمەڵایەتییەكان، پاڵنەری سەرەكین بۆ ئەنجامدانی ئەو نەشتەرگەرییە ترسناكە، ئەوەش بە وتەی پزیشكێكی پسپۆڕی جوانكاری.

پاش زۆبوونی نەشتەرگەری جوانكاری لوت، خانمان روویان كردووەتە نەشتەرگەری جوانكاری سمت، زۆربەی ئەو كەسانەی ئەو نەشتەرگەرییە ئەنجامدەدەن، پێویستیان بەو نەشتەرگەرییە نییە بەڵام وەك خولیاو هەندێك جاریش چاولێكەری، دەیانەوێت سمتیان گەورە بكەن.

نەشتەرگەری جوانكاری سمت بە دوو رێگا ئەنجامدەدرێت، یەكێكیان " دانانی سلیكۆنە"، ئەوەی دیكە دانانی چەورییە بۆ سمت، كە بەووتەی پزیشكانی جوانكاری، رێگەی دووەمیان سەركەوتوو ترە.

د. شاخەوان سائیب، پسپۆڕی جوانكاری لەو بارەیەوە بە (راچڵەكین)ی راگەیاند:"دانانی چەوری بۆ سمت كارێكی هەستیارە، ئەو كەسەی نەشتەرگەرییەكە ئەنجامدەدات دەبێت پزیشك بێت، چونكە پزیشك توێكاری خوێندووە و دەزانێت دەبێت لە چ شوێنێك چەوری دابنێت، ئەگەر بە هەڵە چەوری دانرا ئەوا زیانی دەبێت بۆ نەخۆش و توشی جەڵدەی دڵ،دەماخ و سییەكان دەبێت."

"چەوری ئەگەر بەشێوەیەكی ناڕێك وەربگیرێت هەمووی دەشكێت، پاش ئەوەی دەكرێتە بەشێكی دیكەی جەستەی نەخۆش، ئەو نەشتەرگەرییە سەركەوتوو نابێت و رەق دەبن و دەبنە هۆی هەوركردن ." د. شاخەوان وای وت.

نەشتەرگەری گەورەكردنی سمت لە هەندێك سەنتەری جوانكاری لەشارەكانی كوردستان ئەنجامدەرێت، بەڵام نە ئەو سەنتەرانە شیاون بۆ ئەو نەشتەرگەرییە، نە پێداویستییە پزیشكییەكانیان شیاوە.

د. شاخەوان سائیب، پسپۆڕی جوانكاری

لەو بارەیەوە د.شاخەوان وتی" تەنها هەندێك وێنە بڵاودەكەنەوە لە تۆڕە كۆمەڵایەتییەكان كە پێش نەشتەرگەری و پاش نەشتەرگەری پیشان دەدات، بەڵام وێنەی پاش نەشتەرگەری بەهۆی ئاوساوییەوە سمت گەورە بووە و خەڵكیش وادەزانن ئەو نەشتەرگەرییە سەركەوتوو بووە."

سەبارەت بەڕێژەی ئەنجامدانی نەشتەرگەری گەورەكردنی سمت ئەو پسپۆڕەی جوانكاری ئاشكرایكرد، مانگانە چوار بۆ پێنج كەس داوا دەكەن نەشتەرگەریان بۆ ئەنجامبدات، لەكاتێكدا ساڵی رابردوو مانگی یەك نەشتەرگەری كردووە. دەشڵێت:" هەموویان رەگەزیان مێیە و تەمەنیان زۆربەی لەنێوان 30 بۆ 40 ساڵدایە."

 

وتیشی:" ئەوەندەی من قسەم لەگەڵ نەخۆشەكان كردووە، كچە مۆدێلەكان و وێنەی تۆڕە كۆمەڵایەتییەكان كاریگەری زۆری هەبووە لەسەر ئەو نەخۆشانە، ئەو نەخۆشانەی كەهاتونەتە لای من لە 10 نەخۆش حەوت نەخۆشیان كێشەی نییە و تەنها بەهۆی چاولێكەرییەوە بڕیاری ئەوە دەدەن نەشتەرگەری گەورەكردنی سمت ئەنجامبدەن، من پێیان دەڵێم پێویستت نییە، مەترسییەكانی ئەو نەشتەرگەرییەیان بۆ روون دەكەمەوە، بەڵام هەر سوورن لەسەر ئەنجامدانی نەشتەرگەری گەورەكردنی سمتیان."

كوردستان شێخانی، پسپۆڕی دەرونییە، ئەو پێی وایە دەبێت پێش هەر نەشتەرگەرییەكی جوانكاری، نەخۆش پسپۆڕی دەروونی ببینێت، دەشڵێت:" ئەو كەسانەی جوانكاری دەكەن، زۆربەیان كێشەیان نییە، زۆربەی پزیشكانی جوانكاری رێنماییان ناكەن پسپۆڕی دەروونی ببین، بۆ ئەوەی بۆیان روون بكرێتەوە كێشەیان نییە و پێویستیان بە جوانكاری نییە."

وتیشی:"ئەو كەسەی یەك جار جوانكاری بكات، بەردەوام دەبێت لە ئەنجامدانی نەشتەرگەری دیكەی جوانكاری، من نەخۆشم هەیە چوار جار نەشتەرگەری جوانكاری لوتی كردووە."

كوردستان شێخانی، پسپۆڕی دەرونی

تانیا كفری، كچێكی شارۆچكەی كفرییە، ئەو پێی وایە خانمان نابێت ئەو نەشتەرگەرییە ئەنجام بدەن و بە(راچڵەكین)ی وت" بەداخەوە لەئیستادا ئافرەتیكی زۆر پەنا بۆ تەجمیلی سمت دەبەن، ئەوەش دیاردەیەكی زۆر ناشرینە."

تانیا پێیوایە ئەوانەی ئەو نەشتەرگەرییە ئەنجامدەدەن، مەبەستیانە سەرنجی پیاوان راكێشن و ئاماژەی بەوەكرد:" زیاتر بۆیە ئەو نەشتەرگەرییە دەكەن تا سەرنجی چواردەوریان راكێشن دواتر ئەشڵێن پیاو برسیە، نەخێر پیاو برسی نییە، كاتێ‌ ئافرەتی ئاوا بكات ڕیكلام بۆ جەستەی خۆی دەكات ئەوەش دەبێتە هۆكاری ئەوەی زیاتر سەرنجی پیاوانی لەسەربێت."

تانیا پێی وایە ئەوانەی ئەو نەشتەرگەرییە دەكەن مەبەستیانە بەناوبانگ بن و وتی:" لە لایەن زۆربەی خانمانەوە بۆ بەناوبانگ بوون ئەو نەشتەرگەرییە دەكرێت."

تانیا كفری

شانیا یوسف، دەرچووی زانكۆیە، ئەو پێی وایە پیاوان پێش خۆشەویستی بیر لە سێكس دەكەنەوە، خانمانیش بۆ ئەوەی سێكسی دەركەون ئەو نەشتەرگەرییە ئەنجام دەدەن و دەشڵێت:" گەورەكردنی سمت لە خانماندا بۆ سەرنج ڕاكێشانی پیاوانە،چونكە پیاوان پێش خۆشەویستی بیر لە سێكس دەكەنەوە لەگەڵ خانمێكی سنگ و سمت پڕ و ئەمە زیاتر چێژ و خۆشیان پێدەبەخشێت ،لەبیریشمان نەچێت خانمان بەسروشتی خۆیان حەز ئەكەن هەمیشە سەرنج ڕاكێش دەركەون جێی بایەخی پیاوان بن، هەر بۆیە جیهانی سەرمایەداری ئەم هەلەی بەهەند وەرگرتووە و كۆمەڵێك پێوەری بۆ جوانی و سەرنج ڕاكێشانی خانمان هێناوەتە بازارەوە كە ئابوریەكەی بەقازانجی خۆی دەشكێتەوە و ئەمەشی لەچاوی پیاوانەوە بەرهەم هێناوە ، تا لەڕێیەوە كاڵاكانی خۆیان لە حەب و دەرمان و جل، لەبازارەكاندا ساغ بكەنەوە نەك بەشێوەیەكی سروشتی هانی خانمان بدەن."

شانیا بۆ (راچڵەكین) درێژەی بە قسەكانیدا و ئاماژەی بەوەشكرد" زەرەرمەندی یەكەم خانمانن لە بەكارهێنانی سلیكۆن و مەوادی خراپ، ئەوەی لە كوردستانیش دەگوزەرێ زیاتر خانمە مۆدێلەكان بەكارهێنەرن تا زۆرترین فان و ڤیویان هەبێ كاتێ ڕیكلام بۆ كاڵایەك ئەكەن و زۆرترین بڕە پارە قازانج بكەن."

شانیا یوسف

كەمی نرخی ئەنجامدانی نەشتەرگەری گەورەكردنی سمت هۆكارە بۆ ئەنجامدانی،  نەشتەرگەرییەكە لەنێوان دوو ملیۆن دینار بۆ چوار ملیۆن دینارە، ئەمە نرخێكی كەمە و وادەكات زۆركەس ئەو نەشتەرگەرییە بكەن. پزیشكێكی پسپۆڕی جوانكاری وادەڵێت.

 بەپێی ئەو زانیاریانەی دەست (راچڵەكین) كەوتووە، لە 10  نەشتەرگەری گەورەكردنی سمت، چوار نەشتەرگەری سەركەوتوو نابێت و پێویستە  دووبارە  نەشتەرگەری بۆ نەخۆش بكرێتەوە.