ئەو كچەی حەمكۆ "دەستدرێژی" كردووەتەسەر داواكاری هەیە

6632 جار خوێندراوەتەوە کات02:56 بەروار09-10-2019
ئەو كچەی حەمكۆ
راچڵەكین ـ فەرهەنگ فەرەیدون

بەڕێوەبەری بەڕێوەبەرایەتی توندوتیژی دژی ژنانی هەرێم ئاشكرای دەكات، ئەو كچەی حەمكۆ دەستدرێژی كردووەتەسەر، رەتیدەكاتەوە بەڕێگەی كۆمەڵایەتی كێشەكە چارەسەر بكرێت، داوا دەكات یاسا كێشەكەی بۆ چارەسەر بكات."

كوردۆ عومەر، بەڕێوەبەری بەڕێوەبەرایەتی توندوتیژی دژی ژنانی هەرێم بە راچڵەكین-ی راگەیاند:" باوكی ئەو كچە پێی وتم هیچ هەوڵێك نەبووە بۆ ئەوەی لە رێگەی كۆمەڵایەتییەوە كێشەكە چارەسەر بكرێت."

ئاماژەی بەوەشكرد:"لەسەرەتای كەیسەكەوە رێبەر ئەحمەد، وەزیری ناوخۆی حكومەتی هەرێمی كوردستان ئاگادارە "پشتیوانی ئەو كچە دەكات كە دەستدرێژی كراوەتە سەر."

كوردۆ، وتیشی:" ئەو كچە بەهیچ شێوەیەك ئامادە نییە، هاوسەرگیری لەگەڵ حەمكۆ بكات."

سەبارەت بەقسەكانی "حەمكۆ" كە باسی لەوەكردووە دەستدرێژی سێكسی نەكردووەتە سەر ئەو كچە، بەڵكو بەرەزامەندی هەردووكیان ئەو كارەیان ئەنجامداوە، بەڕێوەبەری بەڕێوەبەرایەتی توندوتیژی دژی ژنانی هەرێم ئاشكرایكرد:" كارەكە بە رەزامەندی كچەكە نەبووە و دەستدرێژی سێكسی بووە."

كوردۆ عومەر، روونیكردەوە:""ئەو كچە لەسەرەتاوە باری دەرونی باش نەبوو، بەڵام ئێستا باری دەرونی زۆر باشە، ئەو زۆر بەهێزە قبووڵی نەبوو غەدری لێبكرێت، داوا دەكەم ئەو خانمانەی دەستدرێژیان كراوەتەسەر نەترسن و سكاڵا تۆمار بكەن."

رۆژی 23-9-2019، پۆلیسی هەولێر " حەمكۆ"یان بەپێی ماددەی 395 لەیاسای سزادانی عیراقی دەستگیر كرد.

بەپێی ماددەی 395ی یاسای سزادانی عیراقی بێت، هەر كەسێك بەڵێنی هاوسەرگیری بەكچێك بدات و دواتر پەشیمان بێتەوە، یاخود لەژێر سێبەری ئەو بەڵێنەدا سێسكی لەگەڵدا بكات و دواتر بەڵێنەكەی نەباتەسەر، بەو مەرجەی كچەكە تەمەنی لە 18 ساڵ بەرەو سەرەوە بێت ئەوا، كەسەكە بە ( 24 كاتكۆ تا 5 ساڵ سزا دەدرێت) بەگوێرەی بارودۆخی تۆمەتەكەی.

حەمكۆ، تائێستا سێجار هاوسەرگیری كردووە، هاوسەری دووەمی لەگەڵ خانمێكی بەڕازیلی بوو بەناوی رۆبێرتا رۆچە و منداڵێكیشیان بەناوی تۆماس هەیە.