چەند دیمەنێك

293 جار خوێندراوەتەوە کات03:07 بەروار09-10-2019
چەند دیمەنێك

*لە یەكێ لە پرسە (تەعزییە)كانی شاری هەولێر، بەڕێكەوت لە تەنیشت كاك (جەمال حاجی ئیبراهیم) نیشتەجێی جارانی شارۆچكەی (دیبەگە) دانیشتم. (حاجی ئیبراهیم) یەكێ لە پیاوە بەڕێزو ناسراوەكانی شارۆچكەكە بوو. هەموو كوڕەكانی (حاجی ئیبراهیم) بە تێكڕا كۆمۆنیست بوون. لە ساڵی (1958) كاك (سەیفەدینی) برا گەورەیان لێپرسراوی بارەگای حزبی شیوعی و مقاوەمەی شەعبی شارۆچكەكەو هەموو ناوچەكە بوو.
دوای تەواوبوونی خوێندنی چەند ئایەتێكی قورئان، مەلای مزگەوتەكە بەشێوەیەكی ئاسایی وتی: (الفاتحە). (كاك جەمال) ویستی (فاتحە) بخوێنێ. منیش یەكسەر دەستم خستە سەر دەستی و وتم: (شت) ئەوە چی دەكەیت…؟ وتی ئێ (فاتحە) دەخوێنم. وتم: نەكەی… فاتیحەی چی…؟ وتی ئاخر مەلا وتی: (الفاتحە) وتم: جا هەقمان بە مەلا چیە…ئەی هەردووكمان كۆمۆنیست نین….؟ بۆچی فاتحە دەخوێنی..؟ (كاك جەمال) لە نێوان خوێندنی (فاتحە)و پێكەنین؛ تێدامابوو. نەیدەتوانی نە (فاتحە)كە بخوێنێ، نە دەشیتوانی پێبكەنێ. سەرەنجام وتی:
-كاكە گیان وازم لێ بێنە.. من تۆبەم كردووەو چومەتە ماڵی خوا… وازم لە هەموو شتێك هێناوە.
دواتر هەردووكمان (فاتحە)مان خوێندو ماڵئاواییمان لەیەكتر كرد.
*لە یەكێ لە هەڵبژاردنەكانی پەرلەمانی عیراق، هەواڵ بە كاك (حەیدەر فەیلی) ئەندامی مەكتەبی سیاسی جارانی حزبی شیوعی كوردستان دەدەن كە خوشكەكەی دەنگی بە لیستی شیعە مەزهەبەكان داوەو خۆی لە لیستی حزبی شیوعی نەبان كردووە. كاتێ كاك (حەیدەر)یش بۆ ساغكردنەوەی راستی و درۆی هەواڵەكە، تەلەفۆنی بۆ دەكات، خوشكەكەی راشكاوانە پێی دەڵێت: بەڵێ دەنگم بە لیستی شیعە مەزهەبەكان داوە. دیارە كاك (حەیدەر) ناڕەحەت دەبێت و پێی دەڵێ: ئاخر دوای ئەو هەموو تەمەنە لە خەبات لەڕیزەكانی حزبی شیوعی، چۆن دەبێ دەنگ بە لیستێكی شیعە مەزهەب بدەیت. خوشكەكەی دەڵێ: جا بۆ خۆت ناڕەحەت دەكەیت، پەنجا ساڵ خەباتمان بۆ حزبی شیوعی كرد تاكو شێوە ژیانێكی مرۆڤانە لە عیراق بێنێتە كایەوە، كەچی رۆژ لەدوای رۆژ ژیان و گوزەرانمان خراپتر دەبێت، ئەوە كۆتایی ژیانمەو لەم دنیایەدا هیچمان بە هیچ نەكرد، ئەم دنیایەمان لەدەست چوو، جەنابت دەتەوێ دنیای دووەمیشمان لەدەست بچێت..؟! نا كاكە نا… بەخوا ئیتر ناهێڵم بەهەشتمان لەدەست بچێت و دەنگ بە ئیسلامیەكان دەدەم.
*جارێكیان لە هەولێر چوومە لای (مام جەلال). بە ڕێكەوت كاك (فەتاحی كاویان) ئەندامی مەكتەبی سیاسی جارانی حزبی دیموكراتی كوردستانی ئێرانی لەلا دانیشتبوو. (كاك فەتاح) هەتا بڵێی پیاوێكی تێكۆشەرو قسەخۆش بوو. (مام جەلال) وەكو پیشەی ئاسایی خۆی هەمیشە حەزی لە پێگەیاندن و بەشان‌وباڵ هەڵدانی هەڤاڵانی (مەكتەبی سیاسی)و سەركردایەتیی (ی.ن.ك) بوو. ویستی من بە (كاك فەتاح) بناسێنێ. وتی: (كاك فەتاح)…! ئەمە فڵانە كەسە.
-دەرچووی زانكۆی بەغدایە… چوار ساڵ زیندانی بووە. دوانزە ساڵ پێشمەرگە بووە، ئێستاش ئەندامی سەركردایەتی (ی.ن.ك) و ئەندام پەرلەمان و لێپرسراوی مەڵبەندی هەولێرو سەرنووسەری رۆژنامەی كوردستانی نوێ و… (كاك فەتاح) نەیهێشت (مام جەلال) قسەكانی تری تەواو بكات و رووی لە (مام جەلال) كرد. بەس.. بەس (مام جەلال) چی ماوەتەوە. مەسەلەی ئەم هەڤاڵەی ئێوە هەر لە مەسەلەی كابرای جۆڵا دەچێت. ئینجا رووی لە من كردو وتی: نیگەران مەبە تازە دەبێ مەسەلەكە بگێڕمەوە.
-جۆڵایەك؛ رۆژانە خەریكی كاری ئاسایی جۆڵایی خۆی بوو، ماڵەوەیان هەندێ بنێشتیان خستبووە دەمی و بنێشتیان پێ خۆش دەكرد… ئینجا هەمبانەیەكیشیان خستبووە ژێری و لەگەڵ جوڵەی جۆڵاییەكەی خۆی هەمبانەكەی خۆش دەكرد.. قامیشێكیان لەسەری قایمكردبوو، لە كونی سەربانەكە چووبووە دەرەوەو سەری قامیشەكە چەند (پەڕەمووچە)ی باڵی تاوسیان لێ بەستابوویەوە، تاكو چۆلەكەكان پاس بكات و نەهێڵێت دانەوێڵە هەڵخراوەكەی سەربان بخۆن. جا توخوا ئەو هەموو كارەی ئەم هەڤاڵەی ئێوەش لەكاری ئەو جۆڵایە ناچێ…؟!.