توانا ئه‌مین :ئەتکوژم، چونکە خۆشم دەوێیت...!

34606 جار خوێندراوەتەوە کات09:58 بەروار17-10-2019
توانا ئه‌مین :ئەتکوژم، چونکە خۆشم دەوێیت...!

ڕاچڵه‌كین-

زۆرێك له‌ ڕۆژنامه‌نوسان و كه‌سانی سیاسی و هاوڵاتیان له‌ڕێی تۆڕه‌ كۆمه‌ڵایه‌تیه‌كان خه‌مباری خۆیان بۆ كۆچی دوایی كوڕه‌ ڕاگه‌یاندنكار ئامانج بابانی و لانه‌ی‌ هاوسه‌ری و منداڵه‌كه‌یان ده‌ربڕیوه‌ ئه‌مه‌ش دوای ئه‌وه‌ی‌ شه‌وی ڕابردوو ته‌رمی هه‌ریه‌ك له‌ پێشكه‌شكاری ناودار ئامانج بابانی و لانه‌ی‌ هاوسه‌ری و منداڵه‌كه‌یان به‌ كوژراوی له‌ناو ئۆتۆمبێله‌كه‌یان دۆزرایه‌وه‌ و پۆلیسی سلێمانی ئاشكرای كردوه‌ كه‌ ڕوداوه‌كه‌ خۆكوژی بووه‌ و په‌یوه‌ندی به‌ تیرۆر كردنه‌وه‌ نه‌بووه‌، تا ئێستاش ئه‌م ڕوداوه‌ قسه‌ی‌ جیاوازی له‌سه‌ر ده‌كرێت له‌نێوان به‌كارهێنه‌رانی تۆڕه‌ كۆمه‌ڵایه‌تیه‌كان.

نوسه‌ر و وه‌رگێڕ توانا ئه‌مین له‌سه‌ر ئه‌م ڕوداوه‌ نوسیویه‌تی"ئەوەی چیرۆکی ئادەم و حەوای خوێندبێتەوە دەزانێ، یەکەمین دڵۆپە خوێن لەسەر ئەم زەوییە نەفرەتییە لەسەر عەشق ڕژاوە..! لێرەوە دەبێ ئەو پارادایمە ساویلکە و دیماگۆژییە وەلاوەنێین کە هەمیشە وا بزانین، عەشق گوڵمان بۆ دەگرێ و دونیا پڕ دەکات لە خەونی پەمەیی، مێژوو ئەو پەیوەندییە دیالێکتیکییەی عەشق و کوشتن دەگێڕێتەوە."

ده‌شڵێت"ئەم هێزە وەحشییەی ناوی خۆشەویستییە؛ ئیمپراتۆرییەتی ڕووخاندووە، خەڵکی لە دینی خۆی هەڵگێڕاوەتەوە، خیانەتی لە مەبدەئە ئەخلاقییەکانی خۆی پێکردووە... خۆشەویستی سێڵاویکی تارە کە هەرشتێک بێتە پێشی ڕایدەماڵێ... هیچ دوو پەیوەندییەک لە دونیادا هێندەی خۆشەویستی و مەرگ لەیەکەوە نزیک نین. کە عەشق خەتەرە هی ئەوەیە توانای ژیان تا مەرگی تێدایە. بەس خۆ هەموو کەسێک بەئاسانی لەم بابەتە ناگات."