گۆڕان : پـــارە لای وەزیــری دارایـی نــیـیـه

150 جار خوێندراوەتەوە کات03:24 بەروار23-10-2019
گۆڕان : پـــارە لای وەزیــری دارایـی نــیـیـه
راچڵەكین - هاوڵاتی

ئەندامێكی جڤاتی نیشتمانی بزوتنەوەی گۆڕان ئاماژە بەوەدەدات كەنیگەرانییەكانی خۆیان گەیاندووەتە پارتی لەسەر پرسی چاكسازی و دانەنانی جێگری سەرۆكی حكومەت بۆ كاروباری چاكسازی.

چالاك موهەندیس، ئەندامی جڤاتی نیشتمانی بزوتنەوەی گۆڕان لەم چاوپێكەوتنەیدا لەگەڵ ‌هاوڵاتی، ئاماژە بەوە دەدات كە وەزیری دارایی كە لای بزوتنەوەی گۆڕانە سكەی پارەی نییەو پارەی لانییە بەتایبەت داهاتی نەوت و دەشڵێت:» لەو باوەڕەدانیم بەشێوەیەكی شەفاف هەموو داهاتەكانی نەوتی پێبگاتەوە«.

هەروەها ئەوە دەخاتەڕوو كە پەیوەندییە سیاسییەكانیان لەگەڵ یەكێتی هەڵپەساردووەو «كردار»یان لەیەكێتی دەوێت.

- بەرچاوتان روون بۆتەوە بۆ بەرنامەی چاكسازی  كە كابینەی نۆیەم ئەنجامی دەدات؟

چالاك موهەندیس: وەكو بزوتنەوەی گۆڕان نیگەرانی خۆمان بەپارتی راگەیاندووە، بەكردەوە هەرسێ لایەنی بەشدارلەحكومەت پێویستە پێكەوە دابنیشن، ئەگەر نیازپاكی هەبێت دەبێت دابنیشین ئەوە پێشنیاری ئێمە بووە، برادەرانی یەكێتی دەڵێن با كۆبونەوەی دوو قۆڵی بكەین، ئێمە دەڵێین بۆ بەرژەوەندی خەڵك با كۆبوونەوەی سێقۆڵی بكەین كە بەشدارین لەحكومەت، هەم بۆ جێبەجێكردنی بەرنامەی حكومەت، هەم بۆ ئاشتەوایی كۆمەڵایەتی و دڵنەوایی كردنەوەی خەڵك كۆبونەوەی سێقۆڵی ئیداریمان پێویستە.

- نیگەرانییەكانتان گەیاندووەتە مەكتەبی سیاسی پارتی؟

چالاك موهەندیس: لەوردەكاری گەیاندنی پەیامەكە نازانم كە بەكێ گەیەندراوە لەناو پارتیدا، بەڵام وەكو بزوتنەوەی گۆڕان پێمان راگەیاندووە.

- پرسی جێگری سەرۆكی حكومەت بۆ كاروباری چاكسازی كەپشكی گۆڕانە بەچی گەیشتووە؟

چالاك موهەندیس: جێگری سەرۆكی حكومەت بۆ كاروباری چاكسازی كەبەزووترین كات دابنرێت و دەستبەكاربێت و بەرنامە چاكسازییەكەش لەپەرلەمانەوە پەسەندبكرێت و حكومەت جێبەجێی بكات.

- سەقفێكی زەمەنیتان بۆ پارتی دیاری كردبوو كەجێگری سەرۆكی حكومەت بۆ كاروباری چاكسازی و وەكیل وەزیرو پۆستەكانی دیكە دابنرێت؟

چالاك موهەندیس: بۆ كۆی پۆستەكان بە بەڕێوەبەری گشتی  و راوێژكارەكانیشەوە لەبەرانبەر قبوڵكردنی جێگری دووەمی سەرۆكی هەرێم بۆ یەكێتی ئێمە سەقفی زەمەنییەكەمان لە شەش مانگەوە كورت كردەوە بۆ سێ مانگ، ئەوە سێ مانگ تێپەڕی و جێبەجێ نەكراوەو نیگەرانیمان گەیاندووە.

دانەنانی جێگری سەرۆكی حكومەت بۆ كاروباری چاكسازی لەكۆبوونەوەی داهاتووی جڤاتی نیشتمانیدا باس دەكەین

چوار وەكیل وەزیر كەپشكی گۆڕانە بڕیارە لەم یەك دوو هەفتەیەی ئایندەدا بچێتە بواری جێبەجێكردنەوە، بەڵام قسە ناچێتە گیرفانەوە.

- كابینەی نۆیەم بەكرداری هەنگاوی چاكسازی ئەنجامداوە یان هێشتا بەرچاوتان روون نییە؟

چالاك موهەندیس: دەستپێشخەری هەیە بۆ هەنگاوی چاكسازی، بەڵام ئەوە ناسەلمێنێت كەنیازپاكی حكومەتی لەپشتەوە بێت تەنیا هەوڵی تاكەكەسی هەیە.

لەوانەیە دواخستنی پرۆسەی چاكسازی بەدەستی یەكێتی بێت، بەڵام بەدڵی پارتیشه

- هیچ رێگرییەك دەبینن بۆ پرسی چاكسازی كەكابینەی نۆیەم ئەنجامی نەداوە تا ئێستا؟

چالاك موهەندیس: لەو باوەڕەدام یەكێتی و پارتی هەردووكیان، یەكێتی بەدەرەجەی زیاتر زەرەرمەند بێت لەپرۆسەی چاكسازی بەتێكدانی ئەو لەشكرە بندیوارو دوو موچەو پێنج موچەیە، خەڵك دەناسم پێی راگەیاندووم كە چوار موچە وەردەگرێت لەناو یەكێتی و پارتیدان.

لەوانەیە دواخستنی پرۆسەی چاكسازی بەدەستی یەكێتی بێت، بەڵام بەدڵی پارتیشە، ئەمە ئەوەیە كەدەڵێت بەدەستم نەبێ، بەڵام بەدڵم بێت و پارتیش لەو باوەڕەدام بیەوێت ئەم دۆخە بەم جۆرە بمێنێتەوە. 

- ئەگەر لەشەش مانگی كابینەی نۆیەمدا چاكسازی بەكرداری نەكرێت گۆڕان چی وەڵامی دەنگدەرانی دەداتەوە؟

چالاك موهەندیس: قسەمان دەبێت لەشەش مانگی یەكەم و شەش مانگی دووەم جدی ترو توندتر دەبێت،

- پێتانوانییە خەڵك بێئومێد بووە لەوەی  چاكسازی نەكراوە؟

چالاك موهەندیس: بەشێوەیەكی گشتی نیگەرانین بەوەی كە بەپێكهێنانی كابینەی نۆیەمی حكومەتی هەرێم خەڵكی كوردستان ئاهێك و ئومێدێكی بە بەردا بێتەوە، لەناو ئەم دەریای رەشبینییەدا بێتە دەرەوەو بگاتە كەنارێكی ئارام.

كێشەكان تەنها لەكوردستان نییەو لە دەوروبەرو بەغداش هەیە، رەنگە بەشێكی بەرەوپێشنەچوونی پرۆسەی چاكسازی پەیوەدنی بەو دۆخانەشەوە هەبێت.

- وەزیری دارایی لای بزوتنەوەی گۆڕانە، فەرمانبەران و مامۆستایان سێ مانگ موچەیان لەوادەی خۆی دواكەوتووە، خۆ دەبێت وەزیری دارایی لانی كەم بە خەڵك بڵێت دۆخەكە بەرەو كوێ دەڕوات موچەتان پاشەكەوت دەكرێت یا پێتاندەدرێت بە شەفافی ئەمە روونبكاتەوە؟

وەزیری دارایی كارگەی دروستكردنی پارەی نییە

چالاك موهەندیس: پارە لای وەزیری دارایی نییە، وەزیری دارایی كارگەی دروستكردنی پارەی نییە، حكومەت سامانە سروشتییەكان و داهاتە ناوخۆییەكانە پارە لەوێوە دێت، بێگومان ئەوكاتە وەزیر رۆڵی دەبێت، بەڵام كە پارە نەبێت وەزیر با هەر بڵێت پارەم دەوێ كە نەبێت چی بكات.

- بەڵام سەرۆكی حكومەت دەمێكە بڕیاری داوە كە سەرجەم داهاتە نەوتی و نا نەوتییەكان بگەڕێتەوە لای وەزیری دارایی ئیتر بۆ پارەی لا نییە؟

چالاك موهەندیس: قسە ناچێتە گیرفانەوە هەتا ئێستا لەو باوەڕەدانیم پارە بچێتەوە لای وەزیری دارایی و بەو شەفافیە پارەكان ناچێتەوە لای وەزیری دارایی، بەتایبەت داهاتی نەوت ناچێتەوە لای وەزیری دارایی و بەو شەفافیەتە نییە.

- وەفدێكی باڵای یەكێتی سەردانی بزوتنەوەی گۆڕانی كرد، ئایا پەیوەندییەكانتان ئاسایی بووەتەوە؟

بەفەرمی پەیوەندیی سیاسیمان لەگەڵ یەكێتی نیشتمانی كوردستاندا هەڵپەساردووه

چالاك موهەندیس: بەفەرمی پەیوەندیی سیاسیمان لەگەڵ یەكێتی نیشتمانی كوردستاندا هەڵپەساردووە، بڕیاری جڤاتی نیشتمانی هەیە لەسەر ئەوە، پاش ئەوەی كەئەو هەموو رێكەوتنەمان لەگەڵ یەكێتی هەبوو تەنها لەسەر وەرەقە ماوەتەوە، لەبەرانبەر ئەوەدا نەك رێكەوتنەكە هیچی جێبەجێ نەكراوە، بەڵكو بەپێچەوانەی رێكەوتنەكانیش مامەڵەیان كردووە، خەڵكی ئێمەیان سزاداوەو گواستویانەتەوەو نانبڕاویان كردووە، بۆیە بڕیاری جڤاتی نیشتمانی درا كە تەجمیدی پەیوەندییە سیاسییەكانمان لەگەڵ یەكێتی بكەین، تەنها بەبڕیاری جڤاتی نیشتمانی هەڵدەوەشێتەوە، ئەوەش دوای ئەوەی یەكێتی دەستپێشخەری نیازپاكی خۆی پیشانبدات.

- واتا سەردانەكەی وەفدی یەكێتی ئەو بەستەڵەكەی نەشكاندووە كە جڤات ئەو تەجمیدە سیاسیە هەڵبوەشێنێتەوە؟

چالاك موهەندیس: ئەو سەردانەی وەفدی یەكێتی بۆ پیرۆزبایی بووە لە رێكخەری گشتی و هەڵبژاردنی ئەندامانی خانەی راپەڕاندنی  نوێی بزوتنەوەی گۆڕان، بەڵام قسەیان لەسەر پەیوەندییەكان كردووەو كردار مەرجە، بزوتنەوەی گۆڕان كرداری لەیەكێتی دەوێت.