خانه‌واده‌ی‌ ژه‌نه‌ڕاڵی پایز ئاگادارییه‌كیان بڵاوكرده‌وه‌

3820 جار خوێندراوەتەوە کات11:38 بەروار06-11-2019
خانه‌واده‌ی‌ ژه‌نه‌ڕاڵی پایز ئاگادارییه‌كیان بڵاوكرده‌وه‌

ڕاچڵه‌كین-

له‌ دوای تێپه‌ڕ بوونی چه‌ند هه‌فته‌یه‌ك به‌سه‌ر كۆچی دوای شاعیر و نوسه‌ر محه‌مه‌د عومه‌ر عوسمان ناسراو به‌ ژه‌نه‌راڵی پایز و به‌ مه‌به‌ستی ڕێكخستنی یادی 40 ڕۆژه‌ی‌ كۆچی دوایی خانه‌واده‌كه‌ی‌ مه‌راسیمێك ساز ده‌كه‌ن و ئاگاداریه‌كیان بڵاو كردۆته‌وه‌.

خێزانی حه‌نه‌راڵی پایز له‌ ئاگادارییه‌كه‌دا نوسیویانه‌" هەموو لایەک ئاگادار دەکەینەوە کە خانەوادەکەمان خەریکی ئامادەکارییە بۆ سازکردنی چلەی شاعیری کۆچکردوو محەممەد عومەر عوسمان، تاکە مەراسیمی چلەی شاعیر ئەوەیە کە ئێمە ئێستا ئامادەکاریی بۆ دەکەین و هەر بەڕێزێک خۆی بە دڵسۆزی شاعیر دەزانێت؛ بانگهێشتی دەکەین بۆ هاریکارییمان لەم مەراسیمەدا."

"هەروەها هەموو لایەک ئاگادار دەکەینەوە کە مامەڵەکردن بە بەرهەم و میراتی ژەنەراڵی پاییز-ەوە بە تەنیا مافی ئێمەیە، بە تایبەتیی تاقە دیوانەکەی «لە غوربەتا»، کە هەوڵ دەدەین لە ئاییندەدا بە شێواز و چاپێکی شاییستەوە لە چاپی بدەینەوە و بیخەینە بەر دەستی خوێنەران و هۆگرانی شیعرە پاییزییەکانی ژەنەراڵ."

وەکو پێڕەوییکردن لە نەریتی باویش، کەلوپەل و ئامرازە بەکارهێنراوەکان و نووسین و تابلۆکانی شاعیریش بۆ نماییشکردن هەڵدەگرین و لە کاتی خۆی و لە جێگەی شیاودا بۆ هەواداران نماییش دەکرێن.

یادی ئەم شاعیرە مەزنەمان هەر گەش بێت و با هەمیشە خۆشەویستییە گەورەکەی بۆ مرۆڤ و سرووشت و گیانلەبەران بەرز ڕابگرین و نەهێڵین یادەکەی خامۆش بێت.

خانەوادەی محەممەد عومەر عوسمان
٦/١١/٢٠١٩
سلێمانی


له‌ راگه‌یه‌ندراوێكدا به‌ڕێوه‌به‌رایه‌تیی پۆلیسی سلێمانی ئێواره‌ی‌ سێشه‌ممه‌ 22ی تشرینی یه‌كه‌می 2019 بڵاویكرده‌وه‌ ڕایگه‌یاند، محه‌مه‌د عومه‌ر عوسمان ناسراو به‌ (ژه‌نه‌ڕاڵی‌ پایز) پیشه‌ شاعیرو نوسه‌ر كۆتایی به‌ژیانی‌ خۆی هێناوه‌.

ئاماژه‌ی به‌وه‌شداوه‌ كه‌ پاش ئاگاداركردنه‌وه‌ی‌ هێزه‌كانی‌ پۆلیس ‌و گه‌یشتنی‌ تیمه‌كانی‌ به‌ڵگه‌ی‌ تاوان بۆ شوێنی‌ ڕوداوه‌كه‌، به‌پێی‌ لێكۆڵینه‌وه‌ سه‌ره‌تاییه‌كان، ده‌ركه‌وتووه‌ كه‌ ناوبراو له‌ڕێی‌ خۆهه‌ڵواسینه‌وه‌ له‌ماڵه‌كه‌ی‌ خۆی‌ كۆتایی به‌ژیانی‌ خۆیهێناوه‌.

بەپێی زانیارییەکان دووساڵ پێش ئێستاش ناوبراو هەوڵی خۆکوشتنی داوە بەڵام هه‌وڵه‌كه‌ی سه‌ری نه‌گرتووه‌، محەمەد عومەر عوسمان لەساڵی 1957 لە گەرەكی دەرگەزێنی شاری سلێمانی لە دایكبووە، خوێندی سەرەتایی، ناوەندی و ئامادەیی هەر لەو شارە تەواو كردووە.

ژەنەڕاڵی پایز، لەسەرەتای لاوێتییەوە دەستی بە كتێب خوێندنەوە كردووە لە ساڵی 1975 دەستی كردووە بەنوسینی شعر و بڵاوكردنەوەی.

محەمەد عومەر عوسمان خاوەنی یەك كۆبەرهەمە بەناوی (لە غوربەتا)، لەغوربەتا دوو ماستەر لەسەر شێعرەكانی وەرگیراوە لە چوار نامەی دكتۆرا وەك سەرچاوەی سەرەكی بەكار هاتووە، هاوكات جگە لەوەی شیعرەكانی بۆتە گۆرانی لەلایەن زۆرێك لە هونەرمەندانەوە، بۆ چەندین زمانی جیا وەڕگێڕدراون.