وەزیری کشتوکاڵ و سەرچاوەکانی ئاو: تایبەتمەندی هەڵەبجە لەبەرچاو دەگرین

48 جار خوێندراوەتەوە کات05:30 بەروار02-12-2019
وەزیری کشتوکاڵ و سەرچاوەکانی ئاو: تایبەتمەندی هەڵەبجە لەبەرچاو دەگرین

راچڵەکین-
بێگەرد تاڵەبانی وەزیری کشتوکاڵ و سەرچاوەکانی ئاو دووپاتیکردەوە کە تایبەتمەندی پارێزگای هەڵەبجە هەم وەک ناوچەیەکی هەرە کارەساتبار و قوربانیدەری کوردستان و هەم وەک پارێزگایەکی نوێش لە هەرێمی کوردستان لەبەر چاو دەگرن.

وەزیری کشتوکاڵ، ئەمڕۆ دووشەمە 2-12-2019 پێشوازی لە وەفدێکی پارێزگای هەڵەبجە کرد، بە سەرۆکایەتی ئازاد تۆفیق، پارێزگاری شارەکە، لە میانی دیدارێکدا وەفدی پارێزگاکە، ژمارەیەک پێویستی سنووری هەڵەبجەیان خستە روو کە پەیوەندییان بە وەزارەتی کشتوکاڵ و سەرچاوەکانی ئاوی هەرێمی کوردستانەوە هەیە، لەوانە تەرخان کردنی زەوی بۆ ژمارەیەک پرۆژەی وەبەرهێنان، هەروها دابین کردنی دەرمان و مەوادی پێویست و ئۆتۆمبیل بۆ ڤێتەرنەری پارێزگاکە، لەگەڵ گۆڕینی هۆبەی ئاودێری بۆ فەرمانگە و بەستنەوەی بە کشتوکاڵی هەڵبەجەوە کە تاکو ئێستا سەر بە کشتوکاڵی سلێمانیە. 

هەروەها دامەزراندنی ژمارەیەک کارمەند بۆ فەرمانگە کشتوکاڵییەکانی سنوورەکە بە گرێبەست، ئەمەش لەبەر زۆری پێویستی فەرمانگەکان بە کارمەند . 

وەزیری کشتوکاڵ دووپاتیکردەوە،" بەوپەڕی تواناوە کاردەکەن بۆ جێبەجێکردنی داوکارییەکان و تایبەتمەندی هەڵەبجە لەبەرچاو دەگرن.

 لە بەرامبەردا، پارێزگای هەڵەبجە سوپاسی هەڵوێست و بەدەنگەوە هاتنی وەزیری کشتوکاڵی کرد و ئاماژەی بۆ ئەوەش کرد کە سەردانی وەزیری کشتوکاڵ بۆ پارێزگای هەڵەبجە و رێکخستنی فیستڤالی هەنار بەو ئاستە گەورە و فراوانەی ئەمساڵ کاریگەری ئەرێنی هەبووە لە راکێشانی ژمارەیەکی زۆری میوان بۆ سنوورەکە و ساغکردنەوەی بڕێکی زۆری بەرهەمی جووتیارانی ناوچەکە.