عەلی حەمەساڵح: لای ئێمە چاكسازی لە خاڵە سنوریەكان، نەوت، باج، وەبەرھێنان، دەرمان.. ھەنگاوە گرنگەكانن

70 جار خوێندراوەتەوە کات12:59 بەروار14-12-2019
عەلی حەمەساڵح: لای ئێمە چاكسازی لە خاڵە سنوریەكان، نەوت، باج، وەبەرھێنان، دەرمان.. ھەنگاوە گرنگەكانن

راچڵەكین-

سەرۆكی فراكسیۆنی گۆڕان لەپەرلەمانی كوردستان دەڵێت، لای ئێمە چاكسازی لە خاڵە سنوریەكان، نەوت، باج، وەبەرھێنان، دەرمان... ھتد ھەنگاوە گرنگەكانی چاكسازین ، ئەوەی ئێستا تەنیا یەك ھەنگاوە لە چەندین.

عەلی حەمەساڵح، لەلاپەڕەی تایبەتی خۆی لەتۆڕی كۆمەلایەتی فەیسبووك، ئاماژەی بەچەند خاڵێكی پرۆژەیاسای چاكسازی كردووەو نوسیوویەتی:"جێبەجێبونی گرنگە ".

١- ھەڵوەشاندنەوەی ھەزاران خانەنشینی نایاسایی لە وەزیرەوە بۆ بریكارو خواتر، خستنە باری یاسایی.

٢- رێكخستنەوەی لیستی شەھیدان و كەمئەندامی سەنگەر و زیندانی سیاسی و پێشمەرگەی دێرین لەوانەی شایستەنین، خستنە باری یاسایی.

٣- وەرگرتنەوەی پلە سەربازی و ئیداری لە ئەوانەی لە دەرەوەی شایستەی خۆیان پلەیان بەرزكراوەتەوە.

٤- ڕێگریكردن لە دوو جار سودمەند بون لە موچە.

٥- شەش جێگا ھەیە فەرمانگەی خانەنشینن و ھۆكارێكن بۆ گەندەڵی و لیستی ناڕەوای خانەنشینی، ھەڵدەوەشێتەوەو خانەنشینی لەیەك فەرمانگەدا كۆ دەبێتەوە.

٥- پاسەوانی لە كوردستاندا بوە بە ھۆكارێكی گەورەی گەندەڵی و نادادی، ئەویش رێكدەخرێتەوە.

٦- ھیچ ھێزێكی سەربازی و حیزبی یەكەی ژمێریاری خۆی نامێنێت.

٧- دروستكردنی سندوقی خانەنشینی جێگیر دەكرێت.

٨- بە بۆچونی ئێمە ئەوەی خانەنشینی پلە باڵا لە پرۆژەكەی ئەنجومەن وەزیرانیشدا ھەیە پێویستی بە چاككردنە، بەڵام پێشتر خانەنشینی باڵا زۆر ناڕەوا بوە، كار بۆ چاككردنی دەكەین.
٩- ژمێرەو حسابی سەرجەم ھێزە سەربازی و ئەمنیەكان دەكەونە ژێر چاودێری دیوانی چاودێری دارایی.

سەرۆكی فراكسیۆنی گۆڕان دەڵێت:" جێبەجێكردنی ئەم خاڵانە گرنگە، نەك نوسینی".

عەلی حەساڵح زیاتر دەدوێت و دەڵێت:" لەگەڵ فراكسیۆنەكانی دیكە چەندین ئیزافەی ترمان ھەیە بۆ چاكسازی و جێگیركردنی زۆر خاڵی باشە بۆ خزمەتی گشتی، زۆر سەرنج و تێبینی باشمان بۆ ھاتوە."

دەشڵێت:" ھەر لەم ھەفتەیەدا لەسەر بنەمای بەدواداچونو كاری جدی پەرلەمانی ، لە سەرجەم خاڵە سنوریەكان زانیاری گرنگ ئامادەكراوەو بڕیارە كاری جدی لەسەر بكرێت و سەرۆكایەتی حكومەتیش بڕیاری بەدواداچونی داوە."

رۆژی 11ی ئەم مانگە، ئەنجوومەنی وەزیرانی هەرێم، بەكۆی دەنگ، پرۆژە یاسای چاكسازی مووچەو دەرماڵەو خانەنشینی پلەتایبەتەكانی پەسەندكردو رۆژی دواتر ڕەوانەی پەرلەمانی كوردستان كرا.

لەپرۆژەیاسای چاكسازی لە مووچە و خانەنشینی و دەرماڵە و ئیمتیازاتەكانی دیكە، دەستكاریی مووچە و دەرماڵەی ئەو فەرمانبەر و مامۆستایانە ناكرێت كە بە راستی دەوام دەكەن، بەڵكو مووچەی پلەباڵاكان (سەرۆكایەتییەكانی هەرێمی كوردستان، وەزیر،  تا دەگاتە بەڕێوەبەری گشتینزیكەی 20% كەمدەكرێتەوە.

هەر بەگوێرەی ئەو پرۆژە یاسایە، سەرجەم بەڕێوەبەرایەتییەكانی خانەنشینی هەڵدەوەشێنرێنەوەو یەك بەڕێوەبەرایەتی خانەنشینی نیشتمانی  دادەمەزرێنرێت، تەمەنی یاسایی خانەنشین كەمكراوەتەوە بۆ 60 ساڵ،فەرمانبەر دوای 15 ساڵ خزمەت دەتوانێت خۆی خانەنشین بكات بە مەرجێك تەمەنی لە 45 ساڵ كەمترنەبێت، 400 هەزار دینار كەمترین مووچەی خانەنشینی دەبێت.
 
هەر بەگوێرەی ئەو پرۆژە یاسایە، یەكەكانی ژمێریاری سەرجەم یەكەكانی هێزی پێشمەرگە بە یەكەی 70 و 80 یەكدەخرێنەوە، دوو مووچەیی بەدەر لە یاسا ناهێڵدرێت، پێداچوونەوە بەو دەرماڵانە دەكرێت كە بەدەر لەیاسا دراون بەتایبەتی دەرماڵەی مەترسی.