بەڕێوەبەری تاقیگەی دهۆك و كارمەندێكی بەڕێوەبەرایەتییەكە بەچەند تۆمەتێك دەستگیردەكرێن

99 جار خوێندراوەتەوە کات10:39 بەروار14-01-2020
بەڕێوەبەری تاقیگەی دهۆك و كارمەندێكی بەڕێوەبەرایەتییەكە بەچەند تۆمەتێك دەستگیردەكرێن

راچڵەكین-

بەڕێوەبەری تاقیگەی دهۆك و كارمەندێكی هەمان بەڕێوەبەرایەتی لەسەر بەكارهێنانی كەرەستەی ئێكسپایەر و چەند تۆمەتێكی دیكە لەلایەن هێزێكی تایبەتەوە دەستگیركران. بەپێی زانیارییەكان، دوو كارمەندی دیكەی سەنتەری دڵ و سەنتەری شێرپەنجەی دهۆكیش فەرمانی گرتنیان بۆ دەرچووە.
 
رۆژی سێشەممە 7ی كانوونی دووەمی 2020، هەر یەك لە بەڕێوەبەری تاقیگەی دهۆك، لەگەڵ كارمەندێكی دیكەی هەمان بەڕێوەبەرایەتی بە ناوی (م. ئـا) لەلایەن هێزێكی تایبەتەوە دەستگیركران و هەتا ئێستا لەژێر لێكۆڵینەوەدان.
 
سەرچاوەیەكی ئاگادار لە تەندروستیی گشتیی دهۆك كە بەهۆی هەستیاریی بابەتەكە داوای كرد ناوی ئاشكرا نەكرێ، بە (رووداو) راگەیاندووە،  بەپێی ئەو زانیارییانەی لەملا و لەولا بەدەستیان گەیشتووە، ئەو دوو كارمەندە چەند تۆمەتێكیان لەسەرە، لەوانەش بەكارهێنانی كەرەستەی ئێكسپایەر بۆ نەخۆشەكان.

 بەوتەی سەرچاوەكە، باسی تۆمەتی گەندەڵیش دەكرێ لەسەریان، هەرچەندە هیچ تۆمەتێكیان لەسەر ساغ نەبووەتەوە و لێكۆڵینەوەكان بەردەوامن.
 
پێدەچێ هەڵمەتی دەستگیركردنەكان دۆخی بەڕێوەبەرایەتی تەندروستی دهۆكی شلۆق كردبێ. سەرچاوەكە لە لێدوانێكی رۆژی یەكشەممەی رابردوویدا وتی: "دوای ئەو رووداوە ترسێك لەناو كارمەندانی تەندروستیی دهۆك دروستبووە، ئەمڕۆش بڕیاری دەستگیركردن بۆ دوو كارمەندی دیكە لە سەنتەری دڵ دەرچووە، جگە لەوە باسی ئەوە دەكرێ كە كارمەندێكی سەنتەری شێرپەنجەش تۆمەتی دراوەتە پاڵ".
 
د.محەممەد ساڵح، جێگری بەڕێوەبەری گشتی تەندروستیی دهۆك، وێڕای پشتڕاستكردنەوەی هەواڵی دەستگیركردنی بەڕێوەبەری تاقیگەی دهۆك و كارمەندێكی دیكەی هەمان بەڕێوەبەرایەتی، رایگەیاند: "ئەوەی هەتا ئێستا هەیە ئەوەیە گومان دەكرێ ئەوان كەرەستەی ئێكسپایەریان بۆ نەخۆشەكان بەكارهێنابێ و كەیسەكانیان هەتا ئێستا لەژێر لێكۆڵینەوەدایە".
 
بەرپرسەكەی تەندروستیی دهۆك سەبارەت بەو لایەنەی كە ئەو دوو كەسەی دەستگیر كردووە، دەڵێ: "ئێمەش نازانین كێ بوون، بەڵام بە ئێمەیان وتووە كە لێكۆڵینەوەیان لەگەڵ دەكرێ، ئێمەش چاوەڕێی ئەنجامی لێكۆڵینەوەكە دەكەین".
 
سەرپێچییەكانی كەرتی تەندروستیی دهۆك تەنیا لە بەشی دەرمان و پشكنیندا نەماون و بەشی پڕۆژەكانیشی گرتووەتەوە. سەرچاوەكە باسی كەیسی سەرپێچی لە تەندەرەكانی دوو باڵەخانەی سنووری بەڕێوەبەرایەتی گشتیی تەندروستیی دهۆكیش دەكات و دەڵێ: "هەفتەی رابردوو وەزیری تەندروستی بە نووسراوێك چوار كارمەندی دیكەی تەندروستیی دهۆكی سزا داون كە سەرپێچییان لە تەندەرەكاندا كردووە". بڕیار وابوو تەندەری ئەو پڕۆژەیە بە كۆمپانیایەك بدرێ، بەڵام دواتر بە كۆمپانیایەكی دیكە دراوە.
 
د.محەممەد ساڵح ئامادە نەبوو لەبارەی كارمەندەكانی دیكەوە هیچ پشتڕاست بكاتەوە و وتی: "ئەوەی هەتا ئێستا هەیە دوو كارمەندن، ئێمەش چاوەڕێی ئەنجامی لێكۆڵینەوەكەین". لەبارەی كەیسی بەڵێندەرەكانیش گوتی: "ئەو چوار كارمەندەی دیكەی كە پەیوەندییان بە كەیسی بەڵێندەرەكەوە هەیە، ئەوە هەر گومانە و هێشتا لەژێر لێكۆڵینەوەدان". 
 
ئەوە یەكەمجار نییە لە كەرتی تەندروستیی دهۆك سەرپێچی روودەدات، دوو ساڵ لەمەوبەریش لە سنووری قەزای ئامێدی دوو كارمەندی دارایی لەسەر گەندەڵی دەستگیركران.

س: رووداو