لەگەڵ كاك نەوشیروان. .

د. یوسف محەمەد


پێش 2 هەفتە

ئەو نەك هەر كارەكتەرێكی سەرەكیی نزیكەی نیو سەدەی ناو سیاسەتی كوردستان و عێراق بو, بەڵكو تا ئێستاش ڕێچكەی هزر و بیر و بزاوتنی, ڕێچكەیەكی ئیلهام بەخشە بۆ هەمو ئەوانەی خوازیاری جێهێشتنی ڕابردو و گۆڕینی دۆخی ڕزیوی ئێستا و بونیاتنانی دونیایەكی باشترن. 

ئەو دوا ساڵەكانی ژیانی تەرخان كرد بۆ ڕاستكردنەوەی چەوتییەكانی دەسەڵاتی سیاسیی هەرێم. ئەو بە توندی ململانێی ئەكرد بۆ ئەوەی ململانێ ئاسایی بكاتەوە و, ململانێیكان نەبنە هۆی هەڵگیرساندنەوەی شەڕ. ئەو بڕوای به ‌شەڕ نەبو بۆ یەكلاكردنەوەی ململانێ ناوخۆییەكان, بۆیە زۆربەی كات بە ڕەقی ململانێی ئاشتیانەی دەستەبژێری دەسەڵاتداری ئەكرد. ئەو ئامانجەكانی ڕون بون, بۆ گەیشتن پێیان هەم ململانێی ئەكرد هەم گفتوگۆی جددیی بۆ چارەسەری كێشە بنچینەییە‌كانی هەرێمی رەد نەدەكردەوە. ئەو لە ئاڵۆزیی دۆخی ناوخۆیی هەرێم و ناوچەكە ئاگادار بو, هەر بۆیەش سەرەڕای نەپچڕاندنی تاڵە موەكە, بەڵام قەت ‌ هەوسارەكەی زۆر شل نەئەكرد. ئەو بڕوای وابو چاكسازی بە نییەت پاكی ناكرێ, بەڵكو ئیرادەی چاكسازی بە فشاری بەردەوام و نەسرەوتن ئەسەپێنرێ.

ئەو تا ژیا هەر لەبەرەی خەڵك بو, لە دەسەڵاتیش هەر لە پێناوی خەڵك سیاسەتی كرد. هاوڵاتی لای ئەو سەنتەر بو نەك دەسەڵات. لەو تایپەی كاستی سیاسیی كورد نەبو كە بون و مانەوە و بەردەوامیی خۆی بە مانەوە لە دەسەڵاتدا ئەبینێتەوە.

ئەو دەقی نەدەگرت بە تایپ و ڕیتم و ئایدۆلۆژیایەكی دیاریكراوەوە. هەمیشە ئامادە بو بۆ  نوێ بونەوە. ئەو هەمیشە لە بزاوتنێكی بەردەوام دا بو. سەرباری ئەوەی قاڵبویەكی بە ئەزمون و ئەكادیمیی بواری سیاسەت بو, بەڵام ئەو هەر گەنج بو و موحافزكار نەبو. ئەو بویە سەرمەشقی ڕەخساندنی هەل و دەرفەت بۆ نەوەی نوێ و تێپەڕاندنی شەرعییەتی شۆڕشگێڕی و شاخ.

گۆڕان دوای ئەو پێویستی بە بەخۆداچونەوە و خۆ نوێ كردنەوە هەیە. پێویستە بپرسین لەكوێی ڕێچكەی كاركردنی كاك نەوشیروانین؟ ئەگەر خۆمان بە میراتگری كاك نەوشیروان بزانین, پێویستە نەك هەر وەك ئەو بەردەوام بین, بەڵكو ئامادەی نوێكاری و پێشوازیی خوێنی نوێ و, خۆدەرباز  كردن لە چەقبەستن و پیربونی پێشوەختە و ناوادە بین. 

لای من‌ ڕۆژێك نییە بۆ یادكردنەوەی كاك نەوشیروان, بەڵكو ئەو هێشتا لەگەڵمانە.