راچڵەكین-
راوێژكاری وەزیری تەندروستی لوبنان، رایگەیاند، ژمارەی قوربانیانی تەقینەوەكەی بەندەری بەیروت بەرزبووەتەوە بۆ ١٥٤ كوژراو و نزیكەی شەش هەزار بریندار.
رەزا موسەوی، لەلێدوانێكی رۆژنامەوانیدا ئاماژەی بەوەكرد:" ئەگەری هەیە ژمارەی كوژراوانی تەقینەوەكەی بەندەری بەیروت بەرزببێتەوە، بەو پێیەی ١٢٠ بریندار رەوشی تەندروستییان ناجێگیرە و ژمارەیەكیش بێسەرو شوێنن".
سێشەممەی رابردوو تەقینەوەیەك لە بەندەری بەیروت روویدا و بەپێی خەمڵاندنەكان، زیانە ماددییەكانی ئەو تەقینەوەیە بە ١٠ تاوەكو ١٥ ملیار دۆلار ئەژمار دەكرێت.
هەر ئەو كات، میشێل عۆن-سەرۆكی لوبنان رایگەیاند، هۆكاری رووداوەكە تەقینەوەی زیاتر لە 2700 تۆن ماددەی نیتراتی ئەمۆنیۆم بووە كە ماوەی شەش ساڵە لەیەكێك لەئەمبارەكانی بەندەرەكە هەڵگیراوە.