راچڵەكین-
سەركۆماری ئێران، رایگەیاند، لەوڵاتدا رووبەڕووی كێشەی وشكەساڵی جددی بوونەتەوە و سەرچاوەكانی ئاو بۆ نیوە كەمی كردووە و داوای كرد دەست بە ئاوەوە بگیرێت.
تەلەڤیزیۆنی فەرمی ئێران بڵاویكردەوە حەسەن روحانی لە رێگەی ڤیدیۆ كۆنفرانسەوە بەشداری كردووە لە رێوڕەسمی كردنەوەی ژمارەیەك پرۆژە لە پارێزگاكانی هورموزگان، مەزەندەران و خوزستان كە وەزارەتی وزەی لە ئەستۆی گرتوون.
روحانی لە وتارێكیدا كە لە رێوڕەسمەكە پێشكەشی كرد، باسی لە كێشەی وشكەساڵی كرد لە وڵاتەكەیدا و وتی: "ئەمساڵ رووبەڕووی وشكەساڵی بووینەتەوە. سەرچاوە ئاویەكانمان سەدا ٥٠ كەمیكردووە. لەم رۆژانەدا كە وەرزی هاوین نزیكبووەتەوە وەرزی باران بارین كۆتایی هاتووە".
حەسەن روحانی سەبارەت بە رێژەی پڕبوونی بەنداوەكان وتی: "رەوشی بەنداوەكانمان وەك ساڵی رابردوو نییە و ئەمڕۆ زۆرێك لە بەنداوەكانمان بەتاڵن. لەبەرئەوە پێویستە لە كەرتی كارەبادا وریابین كە كێشە لە هایدرۆئەلیكتریك روودەدات".
سەركۆماری ئێران داوای كرد دەستپێوەگرتن لە بەكارهێنانی ئاو و كارەبا لە وڵاتدا بكرێت.