راچڵەکین-
وتەبێژی وەزارەتی کارەبای هەرێمی کوردستان رایگەیاند، لە مانگی رەمەزاندا رۆژانە ١٩-٢٢ کاتژمێر کارەبای نیشتمانی دراوتەوە هاووڵاتییان و رۆژی یەکشەممە بڕیار لەبارەی کاتژمێرەکانی پێدانی کارەبا دەدرێت.
ئومێد ئەحمەد، بەڕێوەبەری کۆنترۆڵی کارەبای هەرێمی کوردستان و وتەبێژی وەزارەتەکە رایگەیاند:" "پێش مانگی رەمەزان رامانگەیاند کە رۆژانە ١٩-٢٠کاتژمێر کارەبای نیشتمانی دەبێت، بەڵام ٢٢ کاتژمێر کارەبا بۆ هاوبەشان دابنیکرا".
دەشڵێت:" رۆژی یەکشەممە ١٦-٥-٢٠٢١، لایەنە پەیوەندارەکانی وەزارەت کۆدەبینەوە، هەڵسەنگاندن بۆ توانای بەرهەم و خواست لەسەر بەکارهێنانی کارەبا دەکەین و بڕیار لەو بارەوە دەدەین."
لە هەرێمی کوردستان زیاتر لە ملیۆنێك و ٦٧٠ هەزار هاوبەشی کارەبا بوونیان هەیە، ئێستا رۆژانە سێ هەزار و ٣٠٠ بۆ سێ هەزار و ٤٠٠ مێگاوات کارەبا بەرهەم دەهێنرێت، خواستیش دەگاتە چوار هەزار مێگاوات.