راچڵەكین –
لەسنووری پارێزگای سەڵاحەدین، تیرۆریستانی داعش هێرشیانكردە سەر پرسەیەك و لەئەنجامدا چوار كارمەندی هێزە ئەمنییەكانی عیراق كوژران و 17 كەسی دیكەش بریندار بوون.
میدیاكانی عیراق لەسەر زاری سەرچاوەیەكی ئەمنییەوە بڵاویانكردەوە، ئەمشەو چەكدارانی گروپی تیرۆریستی داعش، هێرشیان كردە سەر پرسەیەك لە گوندی ئەلبوجیلی لە ناحیەی یەسرب-ی سەر بە پارێزگای سەڵاحەددین و لەئەنجامدا چوار كارمەندی هێزە ئەمنییەكانی عیراق، كە پاسەوانیی پرسەكەیان دەكرد، كوژران و 17 كەسی دیكەش بریندار بوون.
لەكاتی هێرشەكەی تیرۆریستانی داعش، هێزە ئەمنییەكان و بەشداربووانی پرسەكە بە چەك رووبەڕوویان بوونەتەوە، بەڵام نازانرێت چەند چەكداری داعش لەو هێرشەدا كوژراون.
تائێستاش هێزە ئەمنییەكانی عیراق بەفەرمی هیچ راگەیەندراوێكیان لەبارەی هێرشەكەی داعش و زیانە گیانییەكان بڵاونەكردووەتەوە.