راچڵەكین -

لەهەردوو شاری هەولێرو دهۆك، هەشت كۆمپانیای دەرمان بەھۆی سەرپێچی جۆراوجۆر و پابەندنەبوونیان بە ڕێنمایی و مەرجەكانی وەزارەتی تەندروستی و كوالێتی كۆنتڕۆڵی دەرمان، بڕیاری داخستنیان درا.

بەڕێوەبەرایەتی كوالێتی كۆنتڕۆڵی جۆری دەرمان، بڵاویكردەوە، ئەمڕۆ 1-8-2021، تیمەكانیان لە لیژنەی چاودێری بازاڕ، بەهاوكاری پۆلیسی شارەوانی هەولێر، حەوت كۆمپانیای دەرمانیان لەو شارەو كۆمپانیایەكی دیكەشیان لەشاری دهۆك داخست.

كوالێتی كۆنتڕۆڵی جۆری دەرمان-ی سەر بە وەزارەتی تەندروستی، لە راگەیەندراوێكدا ئاماژەی بەوەكردووە، هۆكاری داخستنی ئەو هەشت كۆمپانیایەی دەرمانن بەهۆی سەرپێچی جۆراوجۆر و پابەندنەبوونیان بووە بە ڕێنمایی و مەرجەكانی وەزارەتی تەندروستی و كوالێتی كۆنتڕۆڵی دەرمان.

راگەیەندراوەكە هۆشداری بە سەرجەم كۆمپانییاكانی دەرمان لە هەرێمی كوردستان داوە، لەئەگەری پابەندنەبوون بە رێنماییەكانی تەندروستی، رووبەڕووی سزای یاسایی توند دەكرێنەوە.