راچڵەكین-
وەزیری تەندروستی ڕایدەگەیەنێت، لەمەودوابەبێ نۆرەگرتن ڤاكسین دەدرێت بە خەڵك، جەختیش دەكاتەوە ڤاكسین دەكرێتە مەرجی داوامكردنی فەرمانبەران و مامۆستایان.
د. سامان بەرزنجی، ئەمڕۆ چوارشەممە بەمیدیاكانی نزیك لەپارتی راگەیاندووە:" هەوڵ دەدەین و بڕیارە پێكوتە بكرێتە مەرج بۆ دەوامكردنی فەرمانبەران و مامۆستایان".
وتیشی: "ئێستا ژمارەی بنكەكانی پێدانی پێكوتە زیادیان كردووە، بۆیە فشار لەسەر بنكەكان نەماوە و هەر كەسێك بیەوێت، دەتوانێت راستەوخۆ سەردانی بنكەی وەرگرتنی پێكوتە بكات و دەستبەجێ پێی دەدرێت و ناوی دەخرێتە ناو سیستەمی ئەلیكترۆنی، وەكوو پێشووتر پێویست بە نۆرەگرتن ناكات".
سامان بەرزنجی ئەوەشی خستە ڕوو: "ئێستا زیاتر لە یەك ملیۆن و 945 هەزار ژەمە پێكوتەمان دەست كەوتووە، لەو ژمارەیەش یەك ملیۆن و 112 هەزار ژەم بەكار هاتووە، كە زیاتر لە 625 هەزار كەس ژەمی یەكەمیان وەرگرتووە و 410 هەزار كەسیش هەردوو ژەمە پێكوتەكەیان وەرگرتووە".
باسی لەوەش كرد: "لە ڕۆژانی داهاتوودا تیمەكانی گەڕۆك، كە 30 تیمن لە هەموو هەرێمی كوردستان، دەچنە شوێنە قەڵەباڵغەكان، بۆ ئەوەی خۆیان بەناو خەڵكدا بگەڕێن و پێكوتەیان پێ بدەن".
ڕوونیشی كردەوە، كۆبوونەوەی لیژنەی باڵای بەرەنگاربوونەوەی كۆڕۆنا دەكرێ، بەڵام باسی كەرەنتینە و داخستنی قوتابخانە و زانكۆكان لەئارادا نییە، وتیشی: "ئێستا كە پێكوتەی دژ بە كۆرۆنا بەردەستە، ناگەڕێینەوە بۆ راگەیاندنی كەرەنتینە".
وەزیری تەندروستی وتیشی: “ئێستا كۆرۆنا لە سەرانسەری هەرێمی كوردستان لە بڵاوبوونەوەدایە، هەرچەند ناتوانین بڵێین ئاستەكەی بەرز بووەتەوە، بەڵام لە هەموو هەرێمی كوردستان رێژەی وەرگرتنی پێكوتە لە نەخۆشخانەكان زیادی كردووە".