راچڵەكین-
شانەی راگەیاندنی ئەمنی رایگەیاند، هەوڵێكی هەڵاتن لە بەندیخانەی تاجی لە باكووری بەغدا پووچەڵكرایەوە.
شانەی راگەیاندنی ئەمنی روونیكردووەتەوە، هێزێكی ئەمنی هاوبەش كە پێكهاتبوون لە لیوای 59ـی پیادە و فیرقەی دووی پۆلیسی فیدڕاڵی، هەوڵێكی هەڵاتنی 3 تیرۆریستیان لە بەندیخانەی تاجی لە باكووری عێراق پووچەڵكردەوە.
ئاماژە بەوەشكراوە، ئەو 3 تیرۆریستە سزای هەتا هەتایی بەندكردنیان بەسەردا سەپێندرابوو، هەوڵیاندا لە بەندیخانەی تاجی لە باكووری بەغداوە رابكەن، هێزە عێراقییەكان تەقەیان لێكرد و یەكێكیان كوژرا و دووانی دیكەش خۆیان رادەستی هێزە عێراقییەكان كردەوە.
شانەی راگەیاندنی ئەمنی دەڵێت كاتێك ئەو تیرۆریستانە لە لای دیواری دەرەوەی بەندیخانە بینران، هێزەكان تەقەیان ئاڕاستە كرد و سەرەتا خۆیان بەدەستەوە نەدا، تا ئەو كاتەی یەكێكیان كوژرا و دووانی دیكەش خۆیان رادەست كردەوە و دۆسیەی لێكۆڵینەوە لەبارەی ئەم رووداوە كرایەوە.
