راچڵەکین-
کۆنسوڵخانەی ئەمریکا لە هەرێم رایگەیاند، نیگەرانن لە دەستگیرکردنی رۆژنامەنوسان و خۆپیشاندەران و چالاکوانان و بەکارهێنانی گازی فرمێسکرێژ و گولـلەی پلاستیکی لە دژی خۆپیشاندەران.
کۆنسوڵخانەی ئەمریکا لە هەولێر راگەیەندراوێکی لە بارەی خۆپیشاندانەکانی رۆژی شەممەی رابردووی هەرێمی کوردستان بڵاوکردووەتەوە و دەڵێت:"ئێمە نیگەرانین لەو ڕاپۆرتانەی کە باس لە بەکارھێنانی گازی فرمێسکڕێژ و گولەی رووپۆشکراو بە پلاستیک و بڵاوەپێکڕدنی خۆپیشاندەران و دەستگیرکردنی ڕۆژنامەوانان و داکۆکیکارانی مافەکانی مرۆڤ و ئەندامانی پەرلەمان لە هەرێمی کوردستانی عیراق دەکەن لە کاتی ئامادەکاری و هەروەها لە کاتی خۆپیشاندانەکان کە لە ٦ مانگی ئاب لە سلێمانی ئەنجامدران.
کۆنسوڵخانەکە ئاماژەی بەوەشکردووە، بۆ ئەوەی دیمۆکراسی سەربکەوێت، حکومەتەکان پێویستە پارێزگای بکەن لە مافەکانی مرۆڤ و ئازادییە بنەڕەتییەکان کە بەپێی دەستوور پارێزراون و کۆمەڵگەی نێودەوڵەتی دانی پێداناون، لەناویاندا ئازادی گردبوونەوە بەشێوەیەکی ئاشتییانە و ئازادی ڕادەربڕین و مافی دادگاییکردنی دادپەروەرانە، هەروەها ڕێگەدان بە ڕۆژنامەڤانان کە بەکاری خۆیان هەستن بەبێ ترس لە تۆڵەسەندنەوە و دەستێوەردانی ناپێویست.
لە راگەیەندراوەکەدا هاتووە: "ئێمە هانی دەسەڵاتدارانی هەرێمی کوردستانی عیراق دەدەین پێداچوونەوە بەو رێوشوێنانە بکەن و جەخت دەکەینەوە لەسەر ئەو ڕۆڵە گرینگەی کە ئازادی ڕاگەیاندن و کۆمەڵگەی مەدەنی و سەروەری یاسا دەیگێڕن لە سیستەمی دیمۆکراسیدا".