راچڵەكین-
بڕیارە ئەمڕۆ هەریەک لە لایەنگرانی موقتەدا سەدر و چوارچێوەی هەماهەنگی و حزبی شیوعی و مەدەنییەکان خۆپیشاندان ئەنجام بدەن.
ساڵح محەمەد عیراقی ناسراو بە وەزیرەكەی موقتەدا سەدر، رێبەری رەوتی سەدار، داوای لەلایەنگرانی رەوتەكە كرد ئەمڕۆ هەیینی هەریەكەو لە پارێزگاكەی خۆی بڕژێنە سەرشەقام و خۆپیشاندان بكەن.
عیراقی لە فەیسبووكی خۆی بڵاویكردووەتەوە:" لایەنگرانی چاكسازی پێویستە لەئامادەباشیدابن ( بۆ پشتیوانی چاكسازی) ئەویش لەڕێی گربوونەوەی هەرەیەكێكیان لەپارێزگاكەی خۆیی و لەكاتژمێر 5:00ی پاشنیوەڕۆی ئەمڕۆ هەیینی."
ئەوە لەكاتێكدایە چوارچێوەی هەماهەنگیش داوای لەلایەنگرانی كرد ئەمڕۆ هەیینی لەنزیك شورای ناوچەی سەوز خۆپیشاندان بكەن بۆ " بەرگریكردن لە دامەزراوە دادوەری و یاساییەكانی دەوڵەت."
هەروەها بڕیارە خۆپیشاندانی حزبی شیوعی و مەدەنییەکان لە گۆڕەپانی فیردەوس لە بەغداد دژی سیاسهتی پشكپشكێنه و میلیشیاكان، بهڕێوهبچێت.
سەرباری تێپەڕبوونی زیاتر لە 10 مانگ بەسەر هەڵبژاردنی ئەنجوومەنی نوێنەرانی عیراق، بەڵام هێشتا بەهۆی ناكۆكی لایەنە سیاسییەكان بەتایبەت شیعە، نەتوانراوە حكومەتی نوێ پێبهێنرێت، ئەوەش قەیرانێكی قوڵی سیاسی دروستكردووە.