راچڵەكین

د. بەرهەم ئەحمەد ساڵح، سەرۆكی راسپێردراو بۆ پێكهێنانی حكومەت، بە كەسێكی دەستپاك و میانڕەو وەسفدەكات و راشیدەگەیەنێت: ئەركی كابینەی نوێیە چاكسازی بكات و ئابووریش بەرەوپێش ببات،  خەڵكیش چاوەڕوانە.

سەرۆك كۆماری عێراق لەوتەیەكدا كە ئەمڕۆ 9-4-2020 بەبۆنەی راسپاردنی مستەفا كازمی بۆ پێكهێنانی كابینەی نوێی حكومەت پێشكەشی كرد، رایگەیاند: سەرۆكی راسپێردراوی حكومەت، كەسێكی خەباتكارو دەستپاك و میانڕەوە، هەموو لایەنەكانیش كۆكن لەسەر راسپاردنی بۆ ئەركە.

وتیشی: پشك پشكێنە نەیهێشت عێراق پێش بكەوێت و خۆپیشاندانەكانیش ناڕازایەتی خەڵك بوو لەدژی دەسەڵات.

د. بەرهەم ئاماژەی بەوەكرد كە ئەمڕۆ دۆخێكی نوێ و دیموكراتییە، جەختیشی لەوە كردەوە كە دەبێ كابینەی نوێی حكومەت بە سەرۆكایەتی مستەفا كازمی، چاكسازی بكات و ئابووری وڵاتیش باش بكات و بەرەو پێشەوەی ببات، هاوڵاتیانیش چاوەڕێن حكومەت ئەركەكانی سەرشانی راپەڕێنێت.

سەرۆك كۆماری عێراق باسی لەوەشكرد كە بەرەنگاربوونەوەی پەتای كۆرۆنا، ئەركی ئەم حكومەتەیە.