راچڵەكین
كۆسرەت رەسول عەلی لە پەیامێكدا بۆ مستەفا كازمی راسپێردراو بۆ پێكهێنانی حكومەتی نوێی عێراق، هەڵوێستی یەكێتی ئاشكرا دەكات و داواشدەكات كێشەكانی نێوان هەرێم و بەغدا لەژێر ڕۆشنایی دەستوورو بە لەبەرچاوگرتنی بەرژەوەندییە باڵاكانی هاووڵاتیانی هەرێمی كوردستان و عێراق چارەسەر بكرێن و داوا ڕەواكانی خۆپیشاندەرانیش جێبەجێ بكرێن.
سەرۆكی ئەنجومەنی باڵای سیاسی و بەرژەوەندی یەكێتیی نیشتمانیی كوردستان، پەیامێكی ئاراستەی مستەفا كازمی كرد بەبۆنەی راسپاردنی بۆ پێكهێنانی كابینەی نوێی حكومەتی عێراق، رایگەیاند كە یەكێتی هاوكارو پشتیوانت دەبێت.
دەقی پەیامەكە:
برای بەڕێزم مستەفا كازمی- كاندیدی ڕاسپێردراو بۆ پێكهێنانی حكومەتی عێراقی
پیرۆزبایی ڕاسپاردنت بۆ پێكهێنانی كابینەی نوێی وەزاری حكومەتی عێراقی ئیتیحادی لێ دەكەین.
یەكێتیی نیشتمانیی كوردستان پشتگیرو هاوكارت دەبێ لەو بەرپرسیاریەتییە مێژووییە بۆ تێپەڕاندنی سەرجەم قەیرانەكان و چارەسەركردنی بنەڕەتی كێشەكان.
ڕاسپاردنی جەنابتان لەچوارچێوەی دەستووری عێراقدا بۆ پێكهێنانی حكومەتی عێراقی لە كاتێكدایە عێراق و ناوچەكەو جیهان بە تەنگژەو قەیرانی گەورەدا تێپەڕ دەبێ، هیوادارم بەهاوكاری سەرجەم هێزو لایەنە سیاسییەكان بتوانن زاڵ بن بەسەر قەیرانەكان و كێشەكانی نێوان هەرێم و بەغدا لەژێر ڕۆشنایی دەستوورو بە لەبەرچاوگرتنی بەرژەوەندییە باڵاكانی هاووڵاتیانی هەرێمی كوردستان و عێراق چارەسەر بكرێن و داوا ڕەواكانی خۆپیشاندەران جێبەجێ بكرێن و سەرجەم كێشەو قەیرانەكان چارەسەر بكرێن.
ئێمە لە یەكێتیی نیشتمانیی كوردستان دووپاتی دەكەینەوە كە پێویستە حكومەتی نوێی عێراقی لەسەر بنەمای شەراكەتی ڕاستەقینە بە بەشداری سەرجەم پێكهاتەو نەتەوە جیاوازەكان لەژێر ڕۆشنایی دەستوور پێكبێت و كاربكات بۆ پاراستنی بەرژەوەندی باڵای گەلانی عێراق.
كۆسرەت ڕەسول عەلی
سەرۆكی ئەنجومەنی باڵای سیاسی و بەرژەوەندی
یەكێتیی نیشتمانیی كوردستان