ماركۆ رۆبیو، وەزیری دەرەوەی ئەمریكا

راچڵەكین -

ئیدارەی ئەمریكا لە پرسی كۆتایی هێنان بە شەڕی ئۆكراینا، گرەنتی بە هاوپەیمانەكانی لە ئەوروپا دەدات و دڵنیایان دەكاتەوە كە دانوستانەكانی تایبەت بە چارەسەركردنی پرسی ئۆكراینا، یەكێتی ئەوروپا ناگرێتەوە.

رۆژنامەی نیویۆرك تایمز بڵاویكردەوە، ماركۆ رۆبیو، وەزیری دەرەوەی ئەمریكا لەمیانی كۆبوونەوەی لەگەڵ بەپرسانی باڵای ئەوروپا و ئۆكراینا، كە چەند رۆژی رابردوو لەشاری جنێڤ بەڕێوەچوو، دڵنیایی تەواوی بە وڵاتانی ئەوروپای هاوپەیمانی واشنتۆن داوە دانوستان لەبارەی كۆتایی هێنان بە شەڕی ئۆكراینا هیچ پەیوەندییەكی بە یەكێتی ئەوروپاوە نابێت

رۆژنامەكە بەپشتبەستن بە سەرچاوەكانی لەناو وەزارەتی دەرەوەی ئەمریكا، ئەوەشی خستووەتەڕوو، رۆبیو بە بەرپرسانی ئەوروپای راگەیاندووە، هەر جۆرە رێككەوتنێك لەبارەی ئۆكراینا، كاریگەریی نەرێنی لەسەر بەرژەوەندییەكانی هاوپەیمانە ئەوروپاییەكانی ئەمریكا نابێت و ئەو پرسانەی راستەوخۆ پەیوەستن بە ناتۆ و وڵاتانی ئەوروپا، باسیان لەبارەوە ناكرێت.

ئەم دڵنیایی پێدانەی واشنتۆن لەدوای ناڕەزایی دەربڕینی سەرانی وڵاتانی ئەوروپای هاوپەیمانی ئۆكراینا دێت بەرامبەر ناوەڕۆكی پلانەكەی دۆناڵد ترەمپ لەبارەی ئاشتی لە ئۆكراینا و كۆتایی هێنان بە جەنگ، كە پێیان وابوو بڕگەكانی ناو پلانەكە لە بەرژەوەندی رووسیادایە و دەوڵەتی ئۆكراینای لەقاڵب داوە، داواشیان كردبوو دەستكاریی رێككەوتنەكە بكرێت و ژمارەی بڕگەكانی لە 28 بڕگەوە بۆ 19 بڕگە كەمبكرێتەوە.