راچڵەكین -
كۆماری ئیسلامیی ئێران هەناردەكردنی غاز بۆ عیراق رادەگرێت، وەزارەتی كارەباش هۆكارەكەی بۆ كاری چاكسازی لە بۆرییەكانی گواستنەوەی غاز دەگەڕێنێتەوەو رایدەگەیەنێت: كارەكە ماوەی چەند رۆژێك دەخایەنێت و دووبارە هەناردەكردن دەستپێدەكاتەوە.
ئەحمەد موسا عەبادی، وتەبێژی وەزارەتی كارەبای عیراق لە لێدوانێكدا رایگەیاند: لایەنی ئێرانی ئاگاداریان كردینەوە كە بۆماوەی هەفتەیەك پرۆسەی هەناردەكردنی غاز بۆ عیراق بەتەواوەتی رادەگیرێت.
ئاشكراشیكرد، ئێران بە عیراقی راگەیاندووە كە هۆكاری راگرتنی هەناردەكردنی غاز، بەهۆی كاری چاككردنەوەی ئەو بۆرییانەیە كە غاز لە ئێرانەوە بۆ عیراق دەوازێتەوە، پرۆسەكەش ماوەی هەفتەیەك دەخایەنێت و دوای تەواوبوونی كارەكان، دووبارە هەناردەكردنەوەی غاز دەستپێبكاتەوە.
وتەبێژی وەزارەتی كارەبای عیراق ئاماژەی بەوەكرد، ماوەی سێ رۆژە هیچ بڕە غازێك لە ئێرانەوە نەهاتووە بۆ عیراق و پرۆسەی هەناردكردن بەتەواوەتی راگیراوە، بەپێی ئەو ماوەیەی كە لەلایەن ئێرانەوە دیاریكراوە بۆ چاككردنوەی بۆرییەكانی گواستنەوەی غاز، دوای سێ رۆژی تر كاركان تەواو دەبێت و دووبارە هەناردەكردنەوەی غاز بۆ وێستگەكانی عیراق دەستپێدەكاتەوە.
بەوتەی ئەحمەد موسا، وەزارەتی كارەبای عیراق لەپێناو دروستنەبوونی گرفت بۆ بەرهەمهێنانی كارەبا بەهۆی نەبوونی غازی ئێرانی، بەهاوكاریی وەزارەتی نەوتی عیراق پەنای بۆ وزەی جێگرەوە بردووە بۆ كارپێكردنی وێستگەكانی بەرهەمهێنانی كارەبا، ئەمەش وایكردووە هیچ گرفتێك بۆ بەرهەمهێنانی كارەبا دروست ببێت.
حكومەتی عیراق بۆ دابینكردنی كارەبای پێویست، بەشێوەیەكی سەرەكی پشت بە هاوردەكردنی غازی ئێران دەبەستێت.