راچڵەكین -
سەرۆكایەتی شارەوانی كەلار بڕیاریدا رێكاری یاسایی لەدژی ئەو دوو گەنجە بگرێتەبەر كە لە گرتەیەكی ڤیدیۆیی دەركەوتوون و درەختی باخچەیەك دەشكێنن.
لە راگەیەندراوێكدا كە ئەمڕۆ هەینی 28-11-2025 بڵاویكردووەتەوە، سەرۆكایەتی شارەوانی كەلار رایگەیاندووە، درەخت و سەوزایی شارەكەمان موڵكی هەمووانە و پێویستە پارێزگاری لێ بكەین، سەوزایی و درەختەكانی شاری كەلار بارتەقای ماندووبونی ساڵانێكی زۆر هەوڵ و ماندووبونی ژینگەدۆستانی شار و ستافی شارەوانییە و ماندوبوونێكی زۆری ویستووە كە لە ئێستادا سیمایەكی جوان و ژینگەیەكی تایبەتی بە شارەكە بەخشیوە.
لە بەشێكی دیكەی راگەیەندراوەكەدا ، شارەوانی كەلار هەڵوێستی خۆی بەرامبەر ئەو دوو گەنجەی لە گرتە ڤیدیۆكەدا دەركەوتوون و درەختی باخچەیەك دەشكێنن، ئاشكراكردووەو رایگەیاندووە، وەكو شارەوانی كەلار رێكاری یاسایی دژی ئەو كەسانە دەگرینەبەر كە دەبنە هۆكاری تێكدانی درەخت و سەوزایی و باخچەكانی شارەكە و هیوادارین دیمەنی لەم شێوە دووبارە نەبێتەوە.