راچڵەكین -

لەدوای ئاشكرابوونی تۆڕێكی گەورەی مافیای سەربازیی لە ئۆكراینا، سەرۆكی نوسینگەی تایبەتی ڤۆلۆدیمێر زێلینسكی، بەتۆمەتی تێوەگلان لە گەندەڵییەكە، دەستی لەكاركێشایەوە.

ئەمڕۆ هەینی 28-11-2025، ڤۆلۆدیمێر زێلینسكی، سەرۆكی ئۆكراینا، لە پەیامێكدا بڵاویكردەوە، كەمێك پێش ئێستا، ئەندرێ یرماك، سەرۆكی نوسینگەی تایبەتیم، نامەی دەستلەكاركێشانەوەی لە پۆستەكەی پێشكەش كردم.

هەرچەندە زێلینسكی، هۆكاری دەستلەكاركێشانەوەی سەرۆكی نوسینگە تایبەتییەكەی ئاشكرانەكردووە، بەڵام میدیاكانی ناوخۆی ئۆكراینا بڵاویانكردەوە، ئەندرێ یرماك یەكێكە لەو تۆمەتبارانەی كە لە گەندەڵییەوە تێوەگلاوە و دەستی هەبووە لە دزینی سەدان ملیۆن دۆلاری ئەو پارانەی كە لەلایەن ئەمریكا و وڵاتانی ئەوروپاوە وەك هاوكاری پێشكەشی ئۆكراینا كرابوون.

لەچەند رۆژی رابردوودا، تیمێكی سەر بە نوسینگەی نەهێشتنی گەندەڵیی نیشتمانیی لە ئۆكراینا، لەچوارچێوەی لێكۆڵینەوە لە دۆسییەی ئەو تۆڕە مافیا سەربازییەی كە بەم دواییە ئاشكرابوون، هەڵیكوتایە سەر ئۆفیسی تایبەتی ئەندرێ یرماك و چەندین بەڵگەنامەیان دەستكەوت كە تێوەگلانی ناوبراو لە گەندەڵییەكە دەسەلمێنێت.

ئاشكرابوونی گەندەڵییەكەی ئۆكراینا، كە جگە لە سەرۆكی نوسینگەی تایبەتی زێلینسكی، چەندین فەرماندە و ئەفسەری پلە باڵای سەربازیی ئەو وڵاتە تێوەگلاون، كاردانەوەی زۆری لەسەر ئاستی جیهان و ئەوروپا لێكەوتەوە، لەچەند رۆژی رابردووشدا ڤیكتۆر ئۆربان، سەرۆكوەزیرانی هەنگاریا، ئاشكرایكرد، ئەو تۆڕێكی مافیا سەربازییەی ئۆكراینا، راستەوخۆ پەیوەندییان بە ڤۆلۆدیمێر زێلینسكی سەرۆكی ئەو وڵاتەوە هەیە و بەشی زۆری ئەو هاوكارییانەی رەوانەی ئەو وڵاتە كراببون، لەلایەن ئەو تۆڕە مافیایەوە دزراون.

ئۆربان، جگە لەوەی رایگەیاند كە وەك هەنگاریا بڕیاریانداوە چیتر هاوكاری دارایی پێشكەشی ئۆكراینا نەكەن و رێگەش نادات پارەی خەڵكی وڵاتەكەی بچێتە گیرفانی مافیا سەربازییەكانی ئۆكراینا، داواشی لە وڵاتانی یەكێتی ئەوروپا كرد هەمان بڕیار بدەن و كۆتایی بە ناردنی هاوكارییە داراییەكانیان بۆ ئۆكراینا بهێنن.