راچڵەكین -

ئیدارەی كەمپی هول لە رۆژئاوای كوردستان بڕیاریداوە 260 خێزانی عیراقی لە كەمپەكە ئازاد بكات و رەوانەی زێدی خۆیان بكاتەوە.

روانگەی سووری بۆ مافەكانی مرۆڤ بڵاویكردەوە، ئیدارەی كەمپی هول، 260 خێزانی عیراقی كە كەسوكاری تیرۆریستانی داعشن، ئاگاداركردووەتەوە كە بڕیاری ئازادكردنیان دراوەو رەوانەی عیراق دەكرێنەوە.

بڕیارەكە لەچوارچێوەی هەماهەنگییەكانی نێوان ئیدارەی خۆبەڕێوەبەری و حكومەتی عیراق دێت بۆ گەڕاندنەوەی سەرجەم ئەو خێزانە عیراقییانەی كە كەسوكاری تیرۆریستانی داعشن و لە كەمپی هۆل نیشتەجێكراون، بڕیاریشە سبەینێ یەكشەممە 30-11-2025، ئەو 260 خێزانەی داعش بگەڕێندرێنەوە بۆ عیراق و لە زێدی خۆیان نیشتەجێ بكرێنەوە.
 
لەماوەكانی رابردوودا سەدانی خێزانی عیراقی لە كەمپی هول-ەوە گەڕێندرانەوە بۆ عیراق، مانگی رابردووش 249 خێزانی نیشتەجێی كەمپەكە، كە ژمارەیان 840 كەس بوو، دوای ئازادكردنیان، گەڕێندرانەوە بۆ عیراق و لە كەمپی جدعە لە پارێزگای نەینەوا نیشتەجێكراون.