راچڵەكین-

پارێزگاری سلێمانی رایگەیاند، رێگا بەهاتوچۆ هاوڵاتیان نادرێت نە لەخاكی ئێرانەوە بێتە هەرێمی كوردستان، نە لەهەرێمی كوردستانیشەوە بچێتە ئێران.

ئەمڕۆ چوارشەممە 4-6-2020 هەڤاڵ ئەبوبەكر، پارێزگاری سلێمانی و شاندێكی بەڕێوەبەرایەتی گشتی تەندروستی سلێمانی سەردانی قەزای پێنجوێن –یان كردو دوای كۆبوونەوە لەگەڵ بەرپرسانی قەزاكە ئاماژەی بۆ ئەوەكرد، پلانی نوێ بۆ خۆپارێزی جێبەجێدەكەین و رێكاری نوێ دەگرینەبەر.

هەڤاڵ ئەبوبەكر پارێزگاری سلێمانی لەكۆنگرەیەكی رۆژنامەوانیدا رایگەیاند، لەئێستا ئاستی بڵاوبوونەوەی ڤایرۆسی كۆرۆنا لە سلێمانی و پێنجوێن لەئاستێكی مەترسیدایە و پێویستە رەچاوی زیاتری خۆپارێزی بكرێت.

وتیشی: مەرزی نێودەوڵەتی باشماخ و مەرزی سەیرانبەن بەتەواوی چاودێری دەكرێت و مەرجەكان توندتر دەكرێنەوەو رێگە بەهیچ كەسێك نادرێت هاتوچۆ بكات، نە لەخاكی ئێرانەوە بێتە خاكی هەرێمی كوردستان، نە لەهەرێمی كوردستانیشەوە بچێتە ئێران، هەروەها كەمتەرخەمی لەو خاڵە سنوورییانەوە قبوڵناكەین.