راچڵەکین-
پێشمەرگە دێرینەکانی سلێمانی دژی کەمکردنەوە و دواکەوتنی مووچەکانیان گردبوونەوە و مۆڵەتی مانگێکیان دایە حکومەت سەبارەت بە چاککردنی بارودۆخی ژیان و گوزەرانی هاووڵاتییان.
بەیانی ئەمڕۆ پێنجشەممە ٩-٧-٢٠٢٠، بەشێک لە پێشمەرگە دێرینەکانى کوردستان لە شەقامى سالم لە شارى سلێمانى گردبوونەوە و رایانگەیاند:" نزیکەى حەوت مانگە تەنها یەک موچەمان وەرگرتووە و داوا دەکەین حکومەت بە زوترین کات بڕیاری لەسەدا ٢١٪ بڕینی مووچەی فەرمانبەران هەڵبوەشێنێتەوە".
ئەو پێشمەرگانە مۆڵەتی یەک مانگیان دایە حکومەت بۆ چاککردنی بارودۆخی ژیان و گوزەرانی هاووڵاتییانی هەرێمی کوردستان رایانگەیاند:" ئەگەر لەو ماوەیەدا وەڵاممان نەدرێتەوە گردبوونەوە ناکەین، بەڵکو بە راپەڕینێکی دیکە وەڵامی دەسەڵات دەدەینەوە".