راچڵەكین-
وەزارەتی پیشەسازی و بازرگانی حكومەتی هەرێمی كوردستان پلانی ھەیە ئەو كارگانەی لەچەند ساڵی رابردوودا بەهۆی قەیرانی داراییەوە داخراون، جارێكی تر بەگەڕ بخرێنەوە.
سەردار قوربانی، بەرپرسی پەیوەندییەكانی وەزارەتی پیشەسازی و بازرگانی حكومەتی هەرێمی كوردستان، ڕایگەیاند: "وەزارەتی پیشەسازی كار بۆ ڕەخساندنی ھەلیكار دەكات و بۆ ئەو مەبەستەش ھەوڵ دەدرێت ئەو كارگانەی پێشتر داخراون و كار ناكەن، دووبارە دەست بە كاركردن بكەنەوە. "
وەزیری پیشەسازی لەگەل نوێنەری كارگە داخراوەكان كۆبووەتەوە و پلان ھەیە بۆ بەكارخستنەوەی كارگەكان، خاوەنكارگەكان ھەندێ داواكارییان ھەیە، لەوانەش پێشكەشكردنی خزمەتگوزاری بە ناوچە پیشەسازییەكان و كەمكردنەوەی نرخی كارەبا."
بەرپرسەكەی وەزارەتی پیشەسازی وتیشی: "لە ھەرێمی كوردستان سێھەزار و ٧١٤ كارگە مۆڵەتیان لەلایەن حكوومەتەوە ھەیە، ئێستا بەداخەوە نزیكەی دووھەزار و ٢٧٠ كارگە كار ناكەن، ئەوەش دەكاتە نیوەی زیاتری ڕێژەی كارگەكان."
سەردار قوربانی جەختی كردەوە: "بێگومان ھەموو كارگەكان كە پێشتر دامەزراون لەسەر بنەمایەكی ئابووری بووە، كارنەكردنیان كاریگەریی كردووەتە سەر ئابووریی ھەرێمی كوردستان، خەڵكێك بێكار ماوە، دوای داخستنی ئەو كارگانە، بەرھەمی ناوخۆ كەمی كردووە و چەندین كاریگەریی دیكەی ھەبووە، بەڵام ئێستا وەزارەت كار بۆ ئەوە دەكات كە ئاسانكاری بۆ خاوەنی كارگە داخراوەكان بكات، تا دەست بەكار بكەنەوە." وەك ماڵپەری فەرمی پارتی بڵاویكردووەتەوە.