راچڵەکین –
سەرۆکی پەرلەمانی کوردستان "لە پێناو پاراستنی یەکریزی نیشتمانیی و کۆدەنگی  هێزە سیاسییەکان"دا دانیشتنەکەی ئەمڕۆی دواخست و بەوەش رێی نەدا بەبێ سازانی هێزە سیاسییەکان ئەنجوومەنی کۆمسیارانی هەڵبژاردن کارابکرێتەوە.

رێواز فایەق، سەرۆکی پەرلەمانی کوردستان کۆتایی بە دانیشتنەکەی ئەمڕۆ هێنا کە بەبێ رەزامەندی خۆی و سازان لەگەڵ فراکسیۆنی یەکێتی بڕگەیەکی تایبەت بە کاراکردنەوەی ئەنجوومەنی کۆمسیارانی هەڵبژاردن بۆ زیادکرابوو.

گرژییەکە لە دوێنێوە سەریهەڵدا، کاتێك جێگری سەرۆکی پەرلەمان لە پارتی و سکرتێری پەرلەمان لە تورکمان، بە بێ رەزامەنی سەرۆکی پەرلەمان بڕگەکەیان بۆ دانیشتنەکەی ئەمڕۆ زیادکرد.

یەکێتی پێشتر هۆشداری دابوو کە ئەو هەنگاوە تاکڕەوییە و ناکۆکییە سیاسییەکان قوڵتر دەکاتەوە.

ئەمڕۆش کاتێك دانیشتنەکە دەستیپێکرد، رێواز فایەق سەرۆکی پەرلەمانی کوردستان رایگەیاند: ئەو بڕگەیەی کە بۆ دانیشتنەکە زیادکراوە ناپەیڕەوییە، بۆیە لە پێناو پاراستنی یەکریزی نیشتمانیی و کۆدەنگی  هێزە سیاسییەکان بڕیاری دا دەسەڵاتی رەها و بێ قەیدوشەرتی خۆی بەکاربهێنێت و دانیشتنەکەی ئەمڕۆ بۆ کاتێکی نادیار دوا بخات.

بەوەش دانیشتنەکەی ئەمڕۆ کۆتایی هات و سەرۆکی پەرلەمان هۆڵی پەرلەمانی بەجێهێشت.

دواتریش ئەندامانی فراکسیۆنی یەکێتی چوونە سەر سەکۆی پەرلەمان و رێگەیان نەدا جێگری سەرۆکی پەرلەمان باس لە بەردەوامبوونی دانیشتنەکە بکات.

پاش کۆتاییهاتنی دانیشتنەکەش فراکسیۆنی پارتی رایگەیاند ئەنجوومەنی کۆمسیارانی هەڵبژاردن بە دەنگی 58 پەرلەمانتاری پارتی و پێکهاتەکان درێژکراوەتەوە، بەڵام یەکێتی جەختیکردەوە لەوەی هیچ دەنگدانێك لە پەرلەمان نەکراوە و کۆمسیۆن کارانەکراوەتەوە،

سەرۆکی پەرلەمانیش بە لێدوانێك ئەوەی رەتکردەوە کە کۆمسیۆن کاراکرابێتەوە و بە رۆژنامەنووسانی راگەیاند: دانیشتنی ئەمڕۆی پەرلەمان کۆتایی هات، وەك ئەوەیە مردبێت و مردوو زیندوو نابێتەوە.