راچڵەكین- 

دەسەڵاتی تەندروستی غەززە رایگەیاند، ئیسرائیل تەرمی دەیان فەڵەستینی رادەستكردووەتەوە كە لە جەنگی غەززەدا كوژراون و دەستبەسەر تەرمەكانیاندا گیرابوو.

ئاژانسی رۆیتەرز لەزاری ئەو بەرپرسانەی تەندروستی غەززە بڵاویكردوەتەوە، تەرمی 45 فەڵەستینی كەلەدوای شەڕی غەززە لە 7 ئۆكتۆبەری 2023 كوژراون، گەیشتووەتە كۆمەڵگەی ناسری پزیشكی لە خان یونس.

ئەوەش لەكاتێكدا دێت هێشتا ئیسرائیل تەرمی سەدان فەڵەستینی لەبەردەستە كە لەشەڕی غەززە دا كوژراون و هێشتا رادەست نەكراونەتەوە.

رۆژی دووشەممە 13ی تشرینی یەكەمی 2025 لەچوارچێوەی رێكەوتنی نێوان بزووتنەوەی حەماس و ئیسرائیل كەبەنێوەندگیری ئەمریكا- میسر- قەتەرو توركیا و وەك قۆناغی یەكەمی پلانەكەی دۆناڵ ترەمپ-ی سەرۆكی ئەمریكا ئەنجامدرا، حەماس 20 بارمتەگیراوی ئیسرائیلی رادەستكردەوە، هاوكات ئیسرائیل ژمارەیەك سزادراوی فەڵەستینی ئازاد كرد كە تیایاندا هەیە دەیان ساڵە زیندانیكراوە، لەگەڵ ژمارەیەك كەسی تر كەلەدوای هێرشەكانی 7ی ئۆكتۆبەر دەستگیركرابوون.