راچڵەكین -
مەكتەبی سیاسی یەكێتیی نیشتمانیی كوردستان، پەیامێك ئاڕاستەی یەكێتی ژنانی كوردستان دەكات بەبۆنەی بەستنی كۆنگرەی یەكێتییەكەیان و رایدەگەیەنێت: ئومێدەوارین دروشمی (ژن، خەبات، ژیان) زیاتر گەشە پێبدەن.
دەقی پەیامەكە:
بەڕێزان ئەندامانی كۆنگرەی گشتیی یەكێتی ژنانی كوردستان
بەبۆنەی بەستنی كۆنگرەی یەكێتیەكەتانەوە، هیوای سەركەوتنی كارەكانتان بۆ دەخوازین و ئومێدەوارین دروشمی دێرینەی پڕ جۆش و خرۆشتان (ژن، خەبات، ژیان) زیاتر گەشە پێبدەن بۆ داكۆكیكردن لە مافەكانی كچان و ژنانی كوردستان.
بەڕێزان مێژووی چەندین ساڵی تێكۆشانی ئێوە شاهێدە كە توانیوتانە ڕۆڵتان هەبێت لەدەرفەت ڕەخساندن بۆ خستنەڕووی تواناكانی كچان و ژنان كە لەچەندین بواردا خزمەت بە گەل و وڵاتەكەمان بكەن.
دیارە بەستنی كۆنگرەو پێداچوونەوە و گۆڕانكاری لە تێكۆشانی رێكخراوەتاندا، گوڕو تینێكی زیاتر بەو ڕۆڵەتان دەبەخشێت لە هێنانە پێشەوەی كچان و ژنانی بەتوانا وكارامە لەبوارە ژیارییەكانی كۆمەڵدا. بۆ ئەوەی یەكێتیی ژنان هەمیشە سەرچاوەی هێز و هیوای پێگەیشتنی ژنانی كوردستان بێت لە كایەی گشتی كۆمەڵ و بەشداری سیاسیی لە جومگەكانی حومكڕانی و بزووتنەوەی سیاسی و كۆمەڵایەتی وڵاتەكەماندا.
دووبارە سەركەوتن بۆ كۆنگرەكەتان دەخوازین
مەكتەبی سیاسی
یەكێتیی نیشتمانیی كوردستان