راچڵەکین-
بەڕێوەبەرایەتی گشتی چاودێری و گەشەپێدانی كۆمەڵایەتی هەولێر و كۆمەڵە و ڕێكخراوەكانی كەمئەندامان داوادەکەن حکومەتی هەرێمی کوردستان ساڵی ۲۰۲۱ بە ساڵی كەمئەندامان بناسێندرێت.
لە راگەیەندراوێکدا بەڕێوەبەری گشتی چاودێری و گەشەپێدانی كۆمەڵایەتی هەولێر بڵاویکردووەتەوە، یوسف چاوشین، بەڕێوەبەری گشتی بەڕێوەبەرایەتییەکە لەگەڵ كۆمەڵە و ڕێكخراوەكانی كەمئەندامان کۆبووەوە و هاوڕابوون لەسەرئەوەی کە لە لایەن ئەنجومەنی وەزیران ساڵی ۲۰۲۱ بە ساڵی كەمئەندامان بناسێندرێت و بوودجەیەك بۆ كاروچالاكی و بۆ چارەسەری كێشەكانی كەمئەندامان دابندرێت.
لە راگەیەندراوەکەدا هاتووە، نابێت پرسی كەمئەندامان تەنها لە چوارچێوەی وەزارەتی كار و كاروباری كۆمەڵایەتی كۆ بكرێتەوە و هەر یەك لە وەزارەتی پلان دانان، دارایی، شارەوانی، گواستنەوەو گەیاندن، پەروەردە، تەندروستی، وەرزش و لاوان و وەزارەت و دامودەزگاكانی تر خزمەتی زیاتری توێژی كەمئەندامان بكەن.
کۆمەڵە و رێکخراوەکان داوایانکرد کە ئەنجومەنێك پێك بهێندرێت و سەرجەم كۆمەڵە و ڕێكخراوەكانی تایبەت بە كەمئەندامان تێیدا ئەندام بن و ئەندامەكان بە شێوەی خولی سەرۆكایەتی ئەم ئەنجومەنە بكەن.
بە گوێرەی راگەیەندراوەکە، دەبێت، سیستەم و میكانیزمی گونجاو دابندرێت بۆ بەهێزكردنی پەیوەندی نێوان ڕێكخراوە نێوخۆییەكان، ڕێكخراوە نێودەوڵەتیەكان و دامودەزگاكانی پەیوەندیداری حكومەت بە كاروباری كەمئەندامان و خاوەن پێداویستییە تایبەتەكان، هەروەها راگەیاندن ڕۆڵی زیاتر بگێڕێت لە ئاشناكردنی تاكەكانی كۆمەڵگا بە ماف و ئیمتیازاتی توێژی كەمئەندامان و خاوەن پێداویستییە تایبەتەكان.
رۆژی ٣-١٢-٢٠٢٠، هەموو ساڵێک رۆژی جیهانی خاوەن پێداویستی تایبەتەکانە.