راچڵەكین -
سەنتەری فریاكەوتنی خێرای سلێمانی، نوێترین زانیاری لەبارەی ژەهراویبوونی نزیكەی 30 خوێندكاری پەیمانگەیەكی سلێمانی بڵاودەكاتەوەو رایدەگەیەنێت، لەكاتی گەشتێكیان بۆ هاوینەهەواری دووكان، بەهۆی خواردن-ەوە ژەهراوی بوون.
ئەمڕۆ شەممە، خوێندكارانی پەیمانگەیەكی سلێمانی، بەمەبەستی گەشت و سەیران، چوونە هاوینەهەواری دووكان و لەوێ بەهۆی خۆراكەوە نزیكەی 30 كەسیان ژەهراوی بوون.
سامان نادر، بەڕێوەبەری سەنتەری فریاكەوتنی خێرای سلێمانی 122، راگەیاندووە، لەدوای رووداوەكە، خوێندكارە ژەهراویبووەكان بەمەبەستی وەرگرتنی چارەسەر، رەوانەی نەخۆشخانەی قەزای دووكان كراون.
وتیشی:" شەش خوێندكار بەهۆی خراپیی رەوشی تەندروستییان، بۆ نەخۆشخانەكانی سلێمانی گواستراونەتەوە".
تائێستا هۆكاری ژەهراوی بوونی ئەو خوێندكارانە نەزانراوەو نازانرێت چ جۆرە خواردنێكیان خواردووە كە بووەتە هۆی تێکچوونی تەندروستی ئەو ژمارە زۆرەی خوێندكاران.