راچڵەكین -
سەرۆكوەزیرانی عێراق رایگەیاند، رێگای گەشەپێدان كە لە عێراقەوە بۆ توركیا لەرێگەی گواستنەوەی وشكانیی و ئاسنینەوە درێژدەبێتەوە، دەرفەتێكی ئومێدبەخشە بۆ یەكتربڕینی مێژوو و كولتوور و بەرژەوەندییە هاوبەشەكان.
محەمەد شیاع سوودانی، لەمیانی سەرپەرشتیكردنی كۆنفرانسی "رێگای گەشەپێدان"، كە ئەمڕۆ شەممە لەشاری بەغدا، بە بەشداریی نوێنەرانی توركیا و وڵاتانی كەنداو بەڕێوەچوو، پرۆژەی "رێگای گەشەپێدان"ی خستەڕوو، كە بریتیە لە رێڕەوی گواستنەوەی وشكانیی و ئاسنین لە عێراقەوە بۆ توركیا، راشیگەیاند: ئەو پڕۆەژەیە، پڕۆژەیەكی گەورەیە كە كاری لەسەركراوە بۆ دەستەبەركردنی هەلی كار، پەرەپێدانی دارایی و زیادكردنی بەهای بەرهەمی گشتیی خۆماڵی و بەرهەمی گشتیی نیشتمانی.
سەرۆكوەزیرانی عێراق وێڕای تیشك خستنەسەر ئەوەی رێگای گەشەپێدان توانای هەیە كاریگەرییە نەرێنییەكانی پەیوەست بە پێویستیی فرەچەشنیی ئابووریی و بەرەنگاربوونەوەی گۆڕانی كەشوهەوا بسڕێتەوە، وتیشی:" ئەم پڕۆژەیە بناغەی ئابووری درێژەپێدراوی نانەوتییەو هەروەها خاڵی وەرچەرخانی خزمەتكردنە بە دراوسێكانی عیراق و ناوچەكە".
سوودانی باسی لەوەشكرد رێگای زۆریان بڕیوە لە تەواوكردنی بەندەری مەزنی فاو لەمیانی پرۆژەكەدا و بەندەرەكە دەبێتە دەروازەی جموجۆڵی ئابووری و ئەو ناوچەیەی كە لە دەوری بنیاتدەنرێت، تێكەڵ بە شارە مۆدێرنەكان دەبێت كە زیرەكترین شارەكانی پیشەسازی لە جیهاندا لەخۆدەگرێت.
سەرۆكوەزیرانی عێراق جەختی لەوەشكردەوە رێگای گەشەپێدان شادەماری ئابوورییە و دەرفەتێكی ئومێدبەخشە بۆ یەكتربڕینی مێژوو و كولتوور و بەرژەوەندییە هاوبەشەكان، باسی لەوەشكرد، ئەو رێگاوبان و هێڵانەی ئاسنین كە لە چوارچێوەی پڕۆژەكەدا بنیاتنراون، ئاسانكاریی لە گواستنەوەی كاڵاكاندا دەكەن.