راچڵەكین -
كۆمەڵی دادگەری، راگەیەندراوێك لەبارەی دۆخی ئێستای هەرێمی كوردستان بڵاودەكاتەوەو رایدەگەیەنێت، ئەو كۆبوونەوەیەی پەرلەمان و ئەو دەرئەنجامانەی لێی كەوتووەتەوە لەسەر كۆمیسیۆن، جێگەی سەرنج و ڕەخنەن و مەترسیمان هەیە ئەم جۆرە كارانە هەرێم بەرەو هەڵوەشاندنەوە ببات.
لەو راگەیەندراوەدا كە ئەمڕۆ یەكشەممە بڵاویكردووەتەوە، ئەنجوومەنی باڵای كۆمەڵی دادگەریی، ئامادەیی خۆی دەربڕیوە بۆ بۆ یەكخستنی هێز و دەنگە ناڕازییەكانی دەرەوەی دەسەڵات، لەپێناو "گێڕانەوەی هیوا و متمانە" بۆ هاووڵاتیان و ئامادەبوونیان لەبەردەم سندوقەكانی هەڵبژاردن.
دەقی راگەیەندراوەكە:
ڕاگەیەنراوێك لە ئەنجوومەنی باڵای كۆمەڵی دادگەرییەوە
كۆمەڵی دادگەری كوردستان نیگەرانە لەو بارودۆخەی لە پەرلەمانی كوردستان هاتووەتە ئاراوە و پارتە دەسەڵاتدارەكان نەیانویست لە ماوەی یاسایی تەمەنی پەرلەمان كۆمیسیۆنی هەڵبژاردن كارا بكەنەوە و هەمواری یاسای هەڵبژاردن بكرێت، تا بەشێوەیەكی نایاسایی ماوەی پەرلەمان درێژ كرایەوە و بەو هۆیەوە وەك هەڵوێست و دەربڕینی ناڕەزایەتیی فراكسیۆنی كۆمەڵ و چەند فڕاكسیۆن و پەرلەمانتارێكی دیكە دەستیان لە كار كێشایەوە.
لەم قۆناغەدا و لە پرسی كۆمسیۆنی باڵای سەربەخۆی هەڵبژاردن و ڕاپرسی كۆمەڵی دادگەریی پێی وایە ئەو كۆبوونەوەیەی پەرلەمان و ئەو دەرئەنجامانەی لێی كەوتووەتەوە لەسەر كۆمیسیۆن، جێگەی سەرنج و ڕەخنەن و مەترسیمان هەیە ئەم جۆرە كارانە هەرێم بەرەو هەڵوەشاندنەوە ببات.
تایبەت بە پرسی هەڵبژاردنەكانی پەرلەمانی كوردستان، كۆمەڵی دادگەری لەپێناو گێڕانەوەی هیوا و متمانە بۆ هاووڵاتیان و ئامادەبوونیان لەبەردەم سندوقەكانی هەڵبژاردن و كۆتاییهێنان بەو بارودۆخەی دەسەڵات بەسەر هاوڵاتیانیدا هێناوە، ئامادەیی بۆ یەكخستنی هێز و دەنگە ناڕازییەكانی دەرەوەی دەسەڵات هەیە و كاریشی بۆ دەكات.
سەبارەت بە پرسی بەشە بودجەی هەرێمی كوردستانیش لە پڕۆژەیاسای بودجەی عێراق و ئەو بڕیارانەی لیژنەی دارایی لەسەری ڕێككەوتوون و ئەو ڕاجیایی و ناكۆكییەی لەنێوان لایەنەكان دروست بووە، كۆمەڵی دادگەری پێی وایە بودجە ڕەهەندێكی نیشتمانی هەیە و پەیوەستە بە هەموو تاكێكی عێراق و كوردستانەوە، دەبوو نوێنەرانی كورد لە فڕاكسیۆنە جیاوازەكان لەسەر بەدەستهێنانی مافی هاووڵاتیانی كوردستان لە بودجەدا دوور لە موزایەدە و بازرگانی لەسەر حسابی هاووڵاتی یەكدەنگ بوونایە.
ئەنجوومەنی باڵای كۆمەڵی دادگەریی