راچڵەكین -
دەزگای ئاسایشی هەرێم دەستگیركردنی باندێك لە قەزای چەمچەماڵ رادەگەیەنێت، كە ئەندامی خێزانێكن و جگە لە كاری جادوگەری، بازرگانیشیان بە ماددەی هۆشبەرەوە كردووە.
بەگوێرەی راگەیەندراوێكی دەزگای ئاسایشی هەرێم، لەسەر بنەمای كۆكردنەوەی زانیاری و چاودێری و بەدواداچونی وورد، هێزەكانی بەڕێوەبەرایەتی ئاسایشی ڕۆژئاوای سلێمانی بە فەرمانی دادوەری دادگای لێكۆڵینەوە، لە بەرواری ٢٠٢٣/٥/٢٥ لە قەزای چەمچەماڵ حەوت كەسیان لە ئەندامانی خێزانێك دەستگیركرد، كە هەستاون بە ئەنجامدانی سحر و جادوو و نوشتە لە هاوڵاتیان بە ڕێگەی جیاواز بۆ مەبەستی جیاواز.
لەكاتی دەستگیركردنی تۆمەتبارەكاندا، دەستبەسەر بڕێكی زۆر ماددەی هۆشبەر لە جۆری ( حەشیش و كریستاڵ ) دا گیرا.
دەزگای ئاسایش ئاماژەی بەوەكردووە، بەفەرمانی دادوەری دادگای لێكۆڵینەوە، دەستبەسەر سەرجەم ئەو كەلوپەل و كەرەستە و وێنانەدا گیرا كە تۆمەتبارەكان جادوو سحر و نوشتەیان پێوەدەكرد.
