راچڵەكین -

هێزەكانی دژەتیرۆری عیراق بەهەماهەنگیی هێزی هاوپەیمانی نێودەوڵەتی، ئۆپەراسیۆنێكی لە چیای قەرەچوغ دەستپێكرد بۆ راوەدوونانی تیرۆریستانی داعش.

غازی فەیسەڵ سیان، فەرماندەی هێزی خۆبەخشی قەرەچوغ، بە میدیای فەرمی یەكێتی راگەیاندووە، بۆ گەڕان و بەدواداچوون بەدوای تیرۆریستانی داعش، كاتژمێر 6ی بەیانی ئەمڕۆ هەینی، هێزێكی دژە تیرۆری عیراق و هاوپەیمانان، ئۆپراسیۆنێكیان لەچیای قەرەچوغ لەنێوان گوندی (عەلیەڕەش و قەڵاتە سۆران) دەستپێكرد.

راشیگەیاند، ئۆپراسیۆنەكە لەكاتێكدایە جوتیارانی ناوچەكە بەنیازی دەستپێكردنی وەرزی دروێنەن، حكومەتی عیراقیش لەهەوڵدایە لەم وەرزەدا رێگە نەدات تیرۆریستان لەچیای قەرەچوغ دابەزنە گوندەكان بەمەبەستی ئەنجامدانی كردەوەی تیرۆریستی و ئاژاوە نانەوە.

فەرماندەی هێزی خۆبەخشی قەرەچوغ ئاماژەی بەوەشكرد، بۆ رێگریكردن لەئەنجامدانی كردەوەی تیرۆریستی، لەم وەرزەو لەڕۆژانی داهاتووشدا چاودێركردنی چیای قەرەچوغ لەلایەن هێزەكانی دژەتیرۆری عیراق چڕتر دەكرێتەوە.