راچڵەکین-

بەرزی پەستانی خوێن بە بکوژی بێدەنگ ناسراوە، چونکە لە سەرەتادا بە هیچ شێوەیەک هیچ نیشانەیەکی دەرناکەوێت، بۆیە دەتوانێت لەگەڵ کەسی تووشبوودا بەردەوامبێت و کەسەکە هەست بە باشییەکی تەواو بکات، بەڵام لەناکاو نەخۆشییەکەی دەربکەوێت.

بەرزبوونەوەی پەستانی خوێن دەتوانێت ببێتە هۆی حاڵەتی کوشندەی وەک جەڵتەی دڵ، جەڵتەی مێشک و نەخۆشییەکانی گورچییلە، هەربۆیە د. تاسکین خان بەرپرس لە بەشی نەخۆشییەکانی دڵ و خوێنبەرەکان لە رێکخراوی تەندروستی جیهان چەند رێنماییەک بە مەبەستی چارەسەرکردنی بەرزبوونەوەی پەستانی خوێن دەخاتەڕوو.

ناوبراو رایگەیاند: یەکەم هەنگاو بۆ کۆنتڕۆڵکردنی بەرزی پەستانی خوێن ئەوەیە تووشبووەکە سەردانی پزیشک بکات و ئەو چارەسەرانەی بۆی دادەنرێت ئەنجامیان بدەت و پابەند بێت بە خواردنی دەرمانەکانییەوە لەکاتی خۆیدا.

ئاماژەی بەوەشکرد: هەنگاوی دووەم ئەوەیە نەخۆشەکە لە شتە زیانبەخشەکان دووربکەوێتەوە، ئەگەر جگەرە کێشە دەبێتە لە جگەرە دووربکەوێتەوە و خوێ لە خواردنەکانیدا بە تەواوی کەمبکاتەوە، دواتر خەوی باش بکات و کاتەکانی خەوی رێکبخاتەوە، لە هەنگاوی کۆتاییشدا هەوڵی کەمکردنەوەی دڵەڕاوکێ بدات.